Japon jurtynyń eleýli kómegi

Elshilikte ótken is-sharada Japonııanyń elimizdegi Tótenshe jáne ókiletti elshisi Iıdjıma Iаsýmasa men О́skemen qalasyndaǵy «Strana chýdes» ońaltý-damytý ortalyǵy» QB tóraǵasy Anna Ipatova granttyq kelisimshartqa qol qoıdy.

Japonııa elshisi qarjylaı qoldaýǵa ıe bolǵan ortalyqty quttyqtaı otyryp, «Kusanone» baǵdarlamasy qarapaıym ha­lyqtyń ómirin jaqsartýǵa, sondaı-aq Japonııa men Qazaqstan arasyndaǵy ekijaqty qarym-qatynastardy odan ári nyǵaıtýǵa yqpal etetinine senim bildirdi.

Ortalyq basshysy grant qar­jysyna balalardy úılerinen ońaltý ortalyqtaryna tasymaldaıtyn kólik alýdy josparlap otyrǵanyn aıtty.

«Aýtıst balalarmen qoǵamdyq kólikke miný biraz qıyndyq týǵyzady. Meniń balam osyndaı dertke shaldyqqan, sondyqtan osyndaı balalary bar ata-analardy jaqsy túsinemin. Olardy damytý qajet, sol sebepti ońaltý, damytý ortalyqtaryna kúnde qatynaýǵa týra keledi. Taksı nemese jeke kólikpen aparamyz, taksımen shyǵyn kóp, al jeke kólik bárinde bola bermeıdi. Sondyqtan aldymen kólik máselesin sheshýime týra kelip tur», dedi ol.

Grant somasy – 64 069 dollar kóleminde. «Strana chýdeske» naqty qansha qarjy beriletini jobany júzege asyrý barysynda jasalatyn kelisimsharttarǵa baılanysty bolmaq.

Elshi Iıdjıma Iаsýmasa «Kusanone» baǵdarlamasyna toq­talyp ótti.

«Kusanone» – Japonııa Úkimetiniń adam qaýipsizdigin qam­tamasyz etý jónindegi shaǵyn aýqymdaǵy áleýmettik jobalarǵa qaıtarymsyz kómegi. Onyń maq­saty – halyqtyń qarapaıym toptaryna járdemdesý, olardyń qaýip­sizdigin qamtamasyz etip, áleýe­tin arttyrý arqyly jergi­likti turǵyndardyń áleýmet­tik damýyn qamtamasyz etý. Baǵdarlamaǵa jergilikti bılik organdary, medısına, bilim berý mekemeleri, úkimettik emes, qoǵam­dyq uıymdar, qoǵamdyq qorlar qatysa alady. Joba densaý­lyq saqtaý, bilim berý, áleýmet­tik qamtamasyz etý, ekologııa, qor­shaǵan ortany qorǵaý, kedeılikpen kúres, t.b. salalarǵa arnal­ǵan», dedi elshi.

Atalǵan baǵdarlama elimizde 1997 jyldan beri júzege asyrylyp keledi. Osy ýaqytta 8 266 005 dollardy quraıtyn 122 joba iske asqan.