Oral qalasynda qazaqsha kúresten «О́ner barysy» týrnıri ótip, oǵan oblystyń mádenıet jáne óner qyzmetkerleri qatysty.
«Jaıyq arena» sport kesheninde ótken tartysty is-sharany Batys Qazaqstan oblystyq dene shynyqtyrý jáne sport basqarmasy men Ǵarıfolla Qurmanǵalıev atyndaǵy oblystyq fılarmonııa uıymdastyrǵan edi. Týrnırge Jańaqala, Qaztalov jáne Syrym aýdandarynan, Oral qalalyq mádenı-aǵartý birlestigi ujymynan jáne oblystyq fılarmonııadan da kúreske beıimi bar mádenıet qyzmetkerleri qatysty.
Sahnada, mádenı is-sharalarda kórinetin ónerpazdar bozkilemde beldesip, ózderin jańa qyrynan tanytty. О́te tartysty ótken dodada Syrym aýdanynyń komandasy jeńimpaz atandy. II oryn oblystyq fılarmonııanyń «Atameken» komandasyna buıyrsa, júldeli III oryndy Jańaqala aýdanynan kelgen palýandar qanjyǵasyna baılady. Júldeger jáne jeńimpaz komandalar dıplom, medal, qarjylaı syılyqpen marapattaldy.
Batys Qazaqstan oblysy