Aqtaýdy Jańa jylǵa daıyndyq jumystary bastaldy. Qalany merekelik keıipke keltirýge 80 mln teńge qarastyrylǵan, dep habarlaıdy Egemen.kz.
Aqtaý qalalyq ákimdigi baspasóz qyzmetiniń málimetinshe, 2025 jyly «New Level» kompanııasymen memlekettik merekeler qarsańynda qalany bezendirý jumystaryna qatysty kelisimshart jasalǵan.
«Kelisimshartqa sáıkes, merdiger uıym jyl basynan beri ár memlekettik mereke aldynda ortalyq kóshelerdegi bılbordtarǵa bannerler ornatý, jyltyraqtar ilý, taqyryptyq jalaýshalar salynǵan sebetter daıyndaý, sondaı-aq shaǵyn sáýlettik nysandardy ornalastyrý jumystaryn júrgizip keledi», – dedi ákimdik.
«New Level» kompanııasy qalany Jańa jylǵa daıyndaýmen de aınalysady. Bıyl buryn satyp alynǵan bıiktigi 20 metr bolatyn eki jasandy shyrsha ornatylady. Olardy jańartylǵan shamdar men oıynshyqtarmen bezendirý josparlanǵan. Shyrshalar dástúr boıynsha 15A shaǵyn aýdandaǵy amfıteatr janynda jáne 19A shaǵyn aýdanyndaǵy Ábish Kekilbaev atyndaǵy mýzeı aýmaǵynda qoıylady.
«Oryndalatyn jumystar aıasynda shyrshalar mańynda jańajyldyq taqyryptaǵy shaǵyn sáýlettik nysandar qoıylady, fotozonalar jabdyqtalady. Sondaı-aq kósheler, aǵashtar, gúlzarlar men butalar jańa gırlıandalarmen jaryqtandyrylady», – dep málimdedi qala ákimdigi.
Aqtaýdy merekelik bezendirý 17-24 jeltoqsan aralyǵynda júrgiziledi. Al shamdar men áshekeılerdi alý 2026 jylǵy 15 qańtarǵa josparlanǵan.
Ákimdik bıyl qoldanylatyn jańa jyldyq áshekeılerdiń basym bóligi jańadan satyp alynǵanyn, sebebi burynǵylarynyń tozǵanyn atap ótti. Jalpy shyǵyn kólemi shamamen 80 mln teńgeni quraıdy.