Jetisý oblysynyń shekaralyq Panfılov aýdanynda jol ınfraqurylymyn jaqsartý jumystary júıeli túrde jalǵasyp keledi. Bul týraly oblys ákimi Beıbit Isabaevtyń aýdan halymen kezdesýinde málim boldy, dep jazady Egemen.kz.
О́tken jyly uzyndyǵy 32 shaqyrymdy quraıtyn «Jarkent–Qorǵas» respýblıkalyq joly tolyq jóndelse, bıyl 178 shaqyrymdyq «Saryózek–Kóktal» avtomagıstraliniń qaıta jańǵyrtý jumystary támamdaldy. Onyń 83 shaqyrymy Panfılov aýdany arqyly ótedi.
Bıyl atqarylǵan negizgi jumystardyń qatarynda Kónbe asýyndaǵy kópirdiń jáne Kóktal aýylynan «Almaty–Qorǵas» trassasyna shyǵatyn 15 shaqyrym joldyń tolyq jóndelýi bar. Sonymen qatar oblystyq mańyzy bar «Jarkent–Sarybel» tas jolynyń 4 shaqyrymynda ortasha jóndeý aıaqtaldy.
Basqunshy aýylyna kiretin jolda kúrdeli jóndeý jalǵasyp jatyr, nysan kelesi jyly paıdalanýǵa berilmek. Ákimniń aıtýynsha, turǵyndar kótergen másele – Yntaly aýylynyń 11,8 shaqyrym kireberis joly – boıynsha da jumystar bastalyp, bıyl asfalt tóseý aıaqtalady. Al abattandyrý men tolyq qabyldaý kelesi jylǵa josparlanǵan.
Jarkent, Áýlıeaǵash jáne Basqunshy eldi mekenderiniń segiz kóshesinde jol jóndeý júrgizilýde. Qazirgi tańda Basqunshy aýylyndaǵy eki kósheniń jumystary bitken. Jarkent qalasy men Áýlıeaǵash aýylyndaǵy ishki kóshelerdi jańartý kelesi jyly jalǵasady.
Aıta keteıik, sońǵy úsh jylda Kerbulaq pen Panfılov aýdandary aýmaǵyndaǵy respýblıkalyq mańyzy bar 241 shaqyrym jol jańartyldy. Bul jumystar tas joldardyń tehnıkalyq jaǵdaıyn normatıvke saı deńgeıge jetkizýge múmkindik berdi. Sonymen birge, bıyl Panfılov aýdanyndaǵy jergilikti mańyzy bar 29 shaqyrym joldy jóndeýge jáne kútip-ustaýǵa qarjy qarastyrylǵan.