XXV Jazǵy Sýrdlımpıadalyq oıyndar aıasynda Tokıoda sýrdo erkin kúresten alǵashqy jarys kúni óz máresine jetti. Búgin bozkilemge shyqqan alty qazaqstandyq balýannyń ekeýi fınalǵa joldama alyp, erteń altyn júlde úshin talasady, dep habarlaıdy Egemen.kz.
57 keli salmaq dárejesinde Ǵabıt Esjanov senimdi ári nátıjeli kún ótkizdi. Alǵashqy beldesýinde ol túrik balýany Mehmet Akıf Sonmezdi qosymsha ýaqytta 6:4 esebimen jeńdi. Jartylaı fınalda Esjanov ýkraınalyq Sergeı Sýsheevskııdi taza jeńispen utyp, fınalǵa berik qadam jasady.
65 kelige deıingi salmaqta Shadııar Pernesh te joǵary deńgeıdegi óner kórsetti. Ol bolgar sportshysy Dılıan Stefanov Dımıtrovty 10:1 esebimen aıqyn jeńýmen bastady. Shırek fınalda venesýelalyq Anhel de Hesýs Gılen Bolıvardy tize búktirip, jartylaı fınalda mońǵol balýany Erhembaıar Namdagorjdy taza jeńispen utty. Osylaısha Pernesh fınalǵa esh kedergisiz ótti jáne chempıondyq ataq úshin kúresin jalǵastyrady.
125 kelige deıingi aýyr salmaqta Qaırathaan Shonqý alǵashqy beldesýinde kýbalyq Osmar Ortız Taýrtony 12:5 esebimen jeńip, jartylaı fınalǵa shyqty. Alaıda sheshýshi kezdesýinde beıtarap sportshy Alekseı Shemarovqa jol berdi. Aıta keteıik, Shonqý keshe grek-rım kúresiniń fınalynda da osy balýanmen beldesken bolatyn. Qazaqstandyq sportshy endi qola júlde úshin kúreske qosylady.
97 keli salmaqta Beksultan Malaıdar jartylaı fınalda úndi sportshysy Sýmıt Dahııaǵa ese jiberip, úshinshi oryn úshin beldesýge ótedi.
Sabyrjan Rsaly shırek fınalda Gevorg Adamıandy tehnıkalyq basymdyqpen jeńgenimen, jartylaı fınalda ýkraınalyq Anatolıı Chervonenkoǵa jol berdi. Erteń ol qola medal úshin talasady.
74 keli salmaq dárejesinde Ǵasyr Turǵynbaı qyrǵyzstandyq Ádilet Japarqulovqa ese jiberdi. Degenmen ol júldege qol sozý múmkindigin saqtap qalyp, erteń jubanysh beldesýinde bozkilemge qaıta shyǵady.
«Qazaqstannyń sýrdo balýandary – álemdik deńgeıdegi myqtylardyń qatarynda. Sportshylardyń daıyndyǵy joǵary, tolyqqandy oqý-jattyǵý jıynyn ótti. Erteń elimizdiń ánurany eki ret shyrqalady dep senemin», – dedi Ulttyq sýrdlımpıadalyq komıtetiniń vıse-prezıdenti Azamat Qarlyǵashev.
Erteń bozkilemde fınaldyq beldesýler, qola júlde úshin kezdesýler jáne jubanysh beldesýleri ótedi. Osy saıystardyń qorytyndysy boıynsha sýrdlımpıadalyq erkin kúrestiń barlyq júldegerleri anyqtalady.