Qaraǵandy oblysynda jol qozǵalysy mádenıetin arttyrýǵa arnalǵan «Úlgili júrgizýshi» aksııasy jalǵasýda. Shara barysynda patrýldik polısııa qyzmetkerleri erejeni qatań saqtap júrgen kólik júrgizýshilerin toqtatyp, olarǵa alǵys bildirýde, dep jazady Egemen.kz.
Osyndaı úlgili azamattardyń biri -30 jyldyq tájirıbesi bar júrgizýshi Svetlana Shvachkına. Úsh onjyldyqtyń ishinde ol birde-bir ret jol qozǵalysy erejesin buzbaǵan jáne jol-kólik oqıǵasyna qatyspaǵan.
«Kólik júrgizip kele jatqanyma 30 jylǵa jýyqtady. Osy ýaqyt ishinde eshqashan ereje buzǵan emespin. Búginde jolda júris-turys mádenıetin qaladaǵy №95 mektep-gımnazııasynda balalarǵa úıretip júrmin. Onda “Sırena” jas jol qozǵalysy ınspektorlary úıirmesin basqaramyn. Jol qaýipsizdigin mektep qabyrǵasynan bastap úıretý - óte mańyzdy», - dedi Svetlana Shvachkına.
Polısııa ókilderiniń aıtýynsha, aksııa aıasynda oblys ortalyǵynda 100-ge jýyq júrgizýshige osyndaı qurmet kórsetilgen.
«Shara “Qaýipsiz jol” jedel-profılaktıkalyq is-sharasy aıasynda ótkizilip jatyr. Maqsat - jol-kólik oqıǵalarynyń aldyn alý jáne júrgizýshiler arasynda ereje saqtaýdy nasıhattaý», - dep málimdedi
Ákimshilik polısııa basqarmasynyń aǵa ınspektory Tatıana Malınovskaıa.Aksııa barysynda Svetlana Shvachkına barsha júrgizýshilerdi jolda muqııat bolýǵa shaqyrdy:
«Barlyq júrgizýshilerge jol júrý erejesin qatań saqtaýdy, jyldamdyqty asyrmaýdy jáne qarsy baǵytqa shyqpaý kerektigin eskertemin», -dedi ol.