Shabyt – elimizdegi eń iri mádenı jobalardyń biri. Álemniń túkpir-túkpirinen kelgen talantty jas ártisterdi, sýretshiler men aqyndardy toǵystyratyn bul festıval daryndy jastardy qoldaýdy, kásibı sheberlikti shyńdaýdy jáne ulttyq ári álemdik mádenıetti keńinen nasıhattaýdy kózdeıdi. Astanada ótken XXVIII halyqaralyq baıqaýǵa bıyl Qazaqstannyń barlyq óńirinen jáne shetelderden kelgen 800-den asa jas shyǵarmashyl tulǵa qatysty, dep jazady Egemen.kz.
Festıval baǵdarlamasy sheteldik jáne otandyq mamandardyń dáristerin, ónerpazdardyń shyǵarmashylyq laboratorııasyn, qala turǵyndary men qonaqtaryna arnalǵan konserttik baǵdarlamalardy qamtydy. Bul alań jas ónerpazdardyń kásibı tájirıbesin arttyryp, jańa múmkindikterge jol ashty.
Sonymen baıqaý qorytyndysana sáıkes, ár nomınasııadan tómendegi ónerpazdar jeńimpaz atandy:Kameralyq hor baǵytynda Tatarstan Respýblıkasy Memlekettik kameralyq hory Gran-prı ıegeri atandy. 1-oryn – Ǵ.Jubanova atyndaǵy Aqtóbe oblystyq fılarmonııasynyń qazaq kameralyq hory 2-oryn – QazUО́Ý «Aralas hory» 3-oryn – «Alataý» jastar hory
Hor dırıjeri nomınasııasynda Gran-prı – Mýsın Dáýrenge buıyrdy. I oryn – Sansyzbaı Erjan, II oryn – Esimhanov Almat, III oryn – Djan Djıan.
Akademııalyq án jáne konsertmeısterlik sheberlik baǵytynda Gran-prı Rahmetova Fırýza men Shynbolat Aıajanǵa tapsyryldy. Birinshi oryn – Alamanova Lıaıla, Abdrahmanova Dınara; ekinshi oryn – Samatqyzy Nursezim, Omargazın Nursultan; úshinshi oryn – Erbolatuly Bekulan men Ýltarakov Dosym.
Kameralyq mýzyka boıynsha Gran-prı Alǵı Aqbıke men Ýzbekov Ilıasqa berildi. Budan bólek, birqatar jas oryndaýshylar birinshi, ekinshi jáne úshinshi oryndardy bólisti.
Folklorlyq ansamblder arasynda Gran-prı «Tarlan» etno ansambline tabystaldy. 1-oryn – «Túrkistan», 2-oryn – «Dostyq sazy», 3-oryn – «Tartý» ansamblderi.
Estradalyq vokalda Trio Moonaisun Gran-prıge ıe boldy. I oryn – Trio MIYA3, II oryn – Trio Altyn ún, III oryn – Trio «Estrada».
Beıneleý óneri men poezııa, kreatıvti ındýstrııa baǵyttarynda da eń úzdik jas ónerpazdar anyqtaldy. Poezııa atalymynda Gran-prı ıegeri – Dáýren Tileýhan, kreatıvti baǵytta – Qamza Bókeıhan.
Festıvaldiń júlde qory da aıtarlyqtaı: Gran-prı — 3 000 000 teńge, I oryn — 1 000 000 teńge, II oryn — 750 000 teńge, III oryn — 500 000 teńge.
Shırek ǵasyrǵa jýyq tarıhy bar «Shabyt» festıvali osy ýaqyt aralyǵynda myńdaǵan talantty jastyń qalyptasýyna jol ashyp, olardyń kásibı bıikterge kóterilýine yqpal etti. Bıylǵy baıqaý da shyǵarmashylyqtyń san alýandyǵyn jáne jas daryndardyń joǵary áleýetin aıqyn kórsetti.
Festıvaldi Mádenıet jáne aqparat mınıstrligi, Astana qalasy ákimdigi, «Mádenı is-sharalardy ótkizý dıreksııasy» jáne Kúlásh Baıseıitova atyndaǵy Qazaq ulttyq óner ýnıversıteti uıymdastyrdy.