Taldyqorǵan joǵary polıtehnıkalyq kolledjinde elimizdegi zamanaýı Fab-Lab ınnovasııalyq zerthanasy ashyldy. Zerthanada teorııa tájirıbemen ushtastyrylyp, ıdeıalar iske asyrylyp, ónerkásip pen IT salasyna qajetti jobalar ázirlenedi, dep jazady Egemen.kz.
Fab-Lab (Fabrication Laboratory) – álemniń jetekshi oqý oryndary qoldanatyn sıfrlyq óndiris zerthanalary jelisiniń halyqaralyq formaty.
Tehnıkalyq jáne kásiptik bilim berý departamentiniń basshysy Áset Muhambetovtiń aıtýynsha, Jumysshy mamandyqtar jylynda osyndaı zamanaýı zerthanalardyń ashylýy – elimizdiń bolashaq ınjenerleri men tehnıkterin daıyndaýdaǵy úlken strategııalyq qadam.
«Fab-Lab jastardyń tek oqyp qana qoımaı, naqty ónim jasap, ınnovasııalyq jobalar ázirleýine múmkindik beredi. Bul – eńbek naryǵyna qajetti jańa býyn mamandaryn qalyptastyrýdaǵy mańyzdy bastama», deıdi Á.Muhambetov.
Oqý-aǵartý mınıstrliginiń málimetinshe, zerthana úsh negizgi baǵytta jumys isteıdi:
- Robototehnıka zerthanasy – NAO gýmanoıd robottary men WorldSkills standarttaryna saı platformalar arqyly qurastyrý jáne baǵdarlamalaý daǵdylaryn damytýǵa arnalǵan.
- 3D modeldeý jáne 3D basyp shyǵarý zerthanasy – Fusion 360, SolidWorks, Blender baǵdarlamalarynda prototıpter men sıfrlyq modelder jasaýǵa múmkindik beredi.
- Jasandy ıntellekt zerthanasy – Python, mashınalyq oqytý, kompıýterlik kórý jáne neırondyq jeliler boıynsha praktıkalyq bilim alýǵa baǵyttalǵan.