Densaýlyq saqtaý salasynda dárilik zattar men medısınalyq buıymdardy satyp alý tıimdiligin arttyrý jáne olarǵa baǵa belgileýdi jaqsartý úshin sharalar kesheni qabyldandy. Bul jumys Joǵary aýdıtorlyq palatanyń nusqamasy boıynsha júrgizildi, dep habarlaıdy Egemen.kz.
Bıyl kóktemde Densaýlyq saqtaý mınıstrliginiń, onyń vedomstvolyq baǵynysty uıymdarynyń jáne biryńǵaı dıstrıbıýtor «SK-Farmasııa» JShS-nyń qyzmetine memlekettik aýdıt júrgizildi. Joǵary aýdıtorlyq palata azamattar men aýrýhanalardyń dári-dármektermen jáne medısınalyq buıymdarmen qalaı qamtamasyz etiletinin tekserdi.
Aýdıt aıaqtalǵannan keıin aýdıt obektilerine anyqtalǵan kemshilikter men buzýshylyqtardy joıý úshin naqty tapsyrmalar berildi.
Júrgizilgen jumys nátıjesinde Densaýlyq saqtaý mınıstrligi Tegin medısınalyq kómektiń kepildik berilgen kólemi (TMKKK) jáne Mindetti medısınalyq saqtandyrý júıesi (MÁMS) sheńberinde dári-dármekter men medısınalyq buıymdardyń shekti baǵalaryn qalyptastyrý qaǵıdalaryna mańyzdy ózgerister engizdi.
Basty maqsat – negizsiz ústeme baǵalardyń aldyn alý
Referenttik baǵa belgileý (basqa elderdegi baǵalardy salystyrý) tártibi jańartyldy jáne baǵa belgileýdi barynsha naqty ári ashyq etý úshin qolda bar ózekti derekter men aqparattyq júıelerdi paıdalana otyryp, baǵalardy tirkeý kózdelgen. Basty maqsat – negizsiz ústeme baǵalardyń aldyn alý.
Jańa mehanızm sheńberinde TMKKK men MÁMS júıesine kiretin 2,9 myń dári-dármek ataýynyń, sondaı-aq bólshek jáne kóterme saýda úshin 4,9 myń dári-dármek baǵasy qaıta qaraldy.
Dárilik zattar boıynsha ózgerister
Densaýlyq saqtaý mınıstrliginiń budan buryn bekitilgen buıryqtaryna da ózgerister engizildi. Nátıjesinde 453 pozısııa boıynsha baǵa tómendedi, 38 pozısııa boıynsha baǵa kóterildi, 601 pozısııa ózgerissiz qaldy. Medısınalyq buıymdardyń 1,4 myń tehnıkalyq sıpattamasy jáne dárilik zattardyń 1,1 myń halyqaralyq patenttelmegen ataýy túzetildi. Qosymsha dárilik zattardyń 28 jańa pozısııasy engizildi.
Halyqaralyq uıymdarymen jasalǵan kelisimder qaıta jańartyldy
Sonymen qatar Biryńǵaı dıstrıbıýtor BUUDB men IýNISEF-ti qosa alǵanda, BUU júıesiniń halyqaralyq uıymdarymen jasalǵan kelisimderdi qaıta qarap, jańartty.
Endi qujattarda mynadaı jańa tarmaqtar bekitildi:
- medısınalyq taýarlardy jetkizý merzimderi men sapasynyń saqtalýy úshin jaýaptylyq;
- josyqsyz jetkizýshilerge aıyppul sanksııalaryn qoldaný;
- ishinara aldyn ala tólem jasaý múmkindigi.
Qabyldanǵan sharalar satyp alý qyzmetiniń ashyqtyǵy men tıimdiligin arttyrýǵa, jetkiziletin dári-dármekter men medısınalyq buıymdardyń sapasyn baqylaýdy kúsheıtýge, sondaı-aq baǵa belgileý mehanızmderin ońtaılandyrýǵa baǵyttalǵan.
Memlekettik aýdıt qorytyndysy boıynsha basqa da tapsyrmalardyń oryndalýy Joǵary aýdıtorlyq palatanyń baqylaýynda tur.