JOLTAP – elorda turǵyndaryna jańa mamandyqtardy meńgerýge, tabysyn arttyrýǵa, jumys tabýǵa nemese jeke isin bastaýǵa múmkindik beretin joba, dep habarlaıdy Egemen.kz qala ákimdiginiń resmı saıtyna silteme jasap.
Jobaǵa qatysýshylar suranysqa ıe sıfrlyq daǵdylardy meńgerip, targetolog mamandyǵyn ıgere alady. Kýrs tyńdaýshylarǵa zamanaýı kásipti úıretip qana qoımaı, naqty jumysqa ornalasý múmkindigin de beredi.
Qazirdiń ózinde túlekterdiń basym bóligi mamandyq boıynsha eńbek etip, óz jobalaryn damytyp keledi.
Oqý baǵdarlamasy 70% praktıkalyq jáne 30% teorııalyq sabaqtardan turady. Stýdentter targettelgen jarnamanyń negizderin, jarnama platformalarynyń jumys prınsıpterin meńgeredi, jarnamalyq kampanııalardy qurýdy, maqsatty aýdıtorııa men básekelesterdi taldaýdy, bıýdjet jasaýdy jáne klıentpen durys kommýnıkasııa ornatýdy úırenedi.
Kýrsty tabysty aıaqtaǵandardyń biri – otbasylyq polıgrafııany damytýǵa target jarnamasyn qoldanyp júrgen Amangúl Jaqypova. Onyń aıtýynsha, oqýǵa jazylý sheshimi jarnamany óz betinshe basqaryp úırený nıetinen týǵan.
«Meni shabyttandyrǵany – jarnamany ózim ornalastyryp, mamandardyń kómegine júginbeı-aq jumys isteı alatynym», deıdi ol.
Amangúl kýrs baǵdarlamasy ózi kútkeninen de paıdaly bolǵanyn atap ótti.
«Kýrs paıdaly ári qyzyqty boldy. Buǵan deıin bul sala týraly múlde bilmeıtinmin. О́zim jarnama júrgizip, polıgrafııamyzǵa jańa klıentter tartyp otyrmyn», deıdi ol.
Targetti iske qosqannan keıingi alǵashqy oń nátıjeler tez baıqalyp, klıentter sany artqan.
Amangúl jańadan bastaýshylarǵa «Target alǵashynda sál kúrdeli kórinýi múmkin, biraq qorqýdyń qajeti joq» dep keńes berdi.
«Jarnamany óziń júrgizý – shyǵyndy únemdeıdi ári isti júrekten jasap, tolyq baqylaýǵa múmkindik beredi», deıdi ol.
Sonymen qatar, ol targettelgen jarnamamen jumys isteý ózine erekshe lázzat syılaıtynyn aıtty.
Aıta keteıik, JOLTAP jobasy Astanada ekinshi jyl júzege asyrylyp jatyr.
Ol qala turǵyndaryna jumys tabýǵa, tabysyn kóbeıtýge jáne eńbek naryǵynda suranysqa ıe mamandyqtardy meńgerýge kómektesedi. Joba iske qosylǵannan beri 36 myń qala turǵyndaryna qoldaý kórsetilgen.
Jobany Astana ákimdigi «Jańa múmkindik» qoǵamdyq qorymen birlesip júzege asyryp keledi. Negizgi maqsat – qysqa merzimdi oqytý jáne jumyspen qamtý, osy sharalar arqyly qala turǵyndarynyń tabysyn arttyrýǵa yqpal etý.