Oblystyq kózi kórmeıtin jáne álsiz kóretin azamattar kitaphanasy múmkindigi shekteýli azamattardyń ýaqyt suranysyna saı izdenisine, rýhanı turǵydan kemeldenýine qoldan kelgenshe jumys isteıdi. О́ńirde 1 oblystyq arnaıy kitaphana, 9 aýdanda kózi kórmeıtin jáne álsiz kóretin azamattarǵa arnalǵan bólimsheler bar.
Múgedektigi bar demeseńiz, olardyń izdenisi kóńil toǵaıtady. Úsh myńǵa jýyq oqyrman kórkem ádebıet aýylynan alystaǵan emes. Kitaphana jumysyn ınklıýzıvti baǵytta uıymdastyrý úshin mańyzdy jobalar júzege asyrylyp jatyr. Múgedektigi bar azamattarǵa ınklıýzııa baǵytynda 13 joba, 2 úıirme jumys isteıdi. «Tiflo-ashana» jobasy aıasynda «Anama arnalǵan aq dastarqan», «Inklıýzııa jáne teatr» jobasy aıasynda «Júrekpen oqyǵan shyǵarmam» atty alǵashqy ınklıýzıvtik teatr baıqaýy uıymdastyryldy. Sońǵysyna óńirimizdegi zaǵıp balalar men jasóspirimder qatysty.
Oblystyq kózi kórmeıtin jáne álsiz kóretin azamattar kitaphanasy múgedektigi bar azamattarǵa shekteýsiz múmkindikter usynyp, olardyń bolashaqqa degen senimin nyǵaıtý úshin aıanbaı eńbek etip keledi. Munda múgedektigi bar 4 qyzmetker jumys isteıdi.
Áýeli kitaphana oqyrmany bolǵan tıfologııa bóliminiń meńgerýshisi Erbol Aqqaıuly qazir osynda eńbek etip jatyr. Bastapqyda Braıl qarpin úırenip bastaǵan edi. Qazir ol kitaphana kelýshilerine óz bilgenin úıretip júr. Erbol áýeli zaǵıp balalarǵa arnalǵan mektep oqýlyqtaryn Braıl qarpine aýdarýdy qolǵa aldy. Kitaphana oqyrmandarynyń suranysyna qaraı mereıtoı ıeleriniń shyǵarmalaryn aýdaryp, qazirgi tańda eki myńǵa jýyq kitap tárjimalady.
Erbol Aqqaıulynyń kásibı sheberligi men jumysyna degen súıispenshiligi ony saladaǵy úzdik mamandardyń birine aınaldyrdy. Ol zaǵıp jandarǵa Braıl qarpinde kitaptar aýdaryp qana qoımaı, olarǵa kompıýterlik saýattylyqty úıretip, árbir oqyrmanmen jeke jumys istep, onyń rýhanı qajettilikterin túsinýge tyrysady. Osylaısha, Erbol Aqqaıuly áleýmettik ınklıýzııany ilgeriletýge óz úlesin qosyp otyr.
Jambyl oblysy