Atyraýda «Urpaǵyńmen myń jasa» jobasy aıasynda júgirý marafony ótti. Oblystyq bilim basqarmasy uıytqy bolǵan marafonǵa 250 áke ózderiniń uldarymen birge qatysty.
Buryn munaıly óńirde dál mundaı is-shara ótpegen edi. Bul – otbasylyq qundylyqty nyǵaıtýǵa, jas býyndy salamattylyq saltyna tárbıeleýdiń mańyzyn nasıhattaýǵa baǵyttalǵan erekshe is-shara. Ákeniń izgilikti isinen úlgi alatyn balalardyń yntasyn sportqa aýdarǵan marafonnyń júlde qory 600 myń teńge. Sportty serik etken ákeler bes shaqyrymǵa, al jasy 11-den asqan uldar úsh shaqyrymǵa júgirdi.
Árıne, sporttyq saıysqa qatysýshynyń maqsaty – jeńimpaz ataný. Alaıda baby keliskenniń baǵy janady. Bul joly ákeli-balaly Erkebulan Atashov pen «Dostyq» mektebiniń 11-synybynda oqıtyn uly Nıkolaı Dinmuhammed jeńimpaz atandy.
«Biz kún saıyn júgiremiz. Bul bizdiń daǵdymyzǵa aınaldy. Sporttyń qaı túri de, ásirese júgirý – densaýlyqtyń, sergek júrýdiń kepili. О́zim osyndaı marafonǵa 2021 jyldan beri qatysyp kelemin. Al ulym 2023 jyldan qatysa bastady. Oblystyq jáne respýblıkalyq saıystarǵa jıi baramyz. Ákesi men uldary júgiretin marafonnyń ótetinin estip, birge qatysýdy uıǵardyq. Baǵymyz janyp, ekeýmiz de jeńimpaz atandyq», deıdi E.Atashov.
Ol bıyl qazan aıynda Úndistanda ótken Azııa chempıonatyna qatysty. Qurlyqtyq dodadan kúmis jáne qola júldemen oraldy. Áýeli 800 metr qashyqtyqta kúmis, keıin 1,5 shaqyrymda qola júlde ıelendi.
Ákeler arasynan márege ekinshi kelgen Bolat Muqashev túrli marafonǵa 2017 jyldan beri turaqty qatysyp júr. Birneshe ret júldeger boldy. Ol – 21 shaqyrymdyq marafondy júgirip ótken jelaıaqtyń biri. Endi onyń jolyn jalǵastyrýdy kózdegen uly Ibragım Jumabaı bul marafonda jeńimpaz bola almady. Biraq alǵashqy ondyqqa kirdi.
Al máre syzyǵyn úshinshi bolyp Rysbek Tórálıev kesti. Marafonǵa onyń uly da qatysqan edi. Alaıda márege on birinshi bolyp jetti.
Sportqa beıim uldar arasynan marafonnyń birinshi júldesin Álim Kóshqalıev ıelendi. Úshinshi orynǵa Asyljan Salyq ıe boldy.
Atyraý oblysy