Prezıdent Qasym-Jomart Toqaev Astana qalasynyń elimizdiń damýyndaǵy orny erekshe ekenin atap aıtyp, ony damytý máselesine udaıy kóńil bólip keledi. Memleket basshysy megapolıstiń ortalyǵy men shet aımaqtary arasyndaǵy teńsizdikti joıyp, elordanyń barlyq aýdanynyń turǵyndary úshin qolaıly bolýyn qamtamasyz etý mindetin qoıdy. «Aspanmen talasqan bıik úıler, aýqatty kvartaldar men kedeı aýdandar, jartylaı qıraǵan ǵımarattar – bul bizdiń jol emes. Jaǵdaıdy «teńestirý» kerek. Ádiletti qoǵam qurý osyndaı ustanymnan bastalady», degen edi ol.
Búginde Astananyń shet jaqtarynda ornalasqan 16 turǵynjaı alaby bar. Sonyń eń irisiniń biri – «Úrker». Elorda ortalyǵynan on shaqyrymdaı qashyqtyqta boı kótergen shaǵyn aýdan keıingi jyldary kórkeıe tústi.
Eń bastysy – úrkerlikterdiń kókeıkesti áleýmettik máseleleri birtindep oń sheshimin taýyp jatyr. Záýlim ǵımaratqa ornalasqan № 12 qalalyq emhana ujymy jergilikti turǵyndarǵa qaltqysyz qyzmet etip keledi. Úrkerlikterdiń densaýlyǵyn nyǵaıtý maqsatynda budan eki jyl buryn «Nura» dene shynyqtyrý-saýyqtyrý kesheni paıdalanýǵa berilgen. Turǵynjaı alabynda fýtbol, basketbol oınap, ártúrli jattyǵýmen aınalysatyn qurylǵylar ornatylǵan birneshe sport alańy bar. Kóshelerge jaıaýjoldar salynyp, jol qaýipsizdigine mán berilip jatyr.
Byltyr «Jaıly mektep» baǵdarlamasy aıasynda jańa bilim ordasy – 2 myń oqýshyǵa arnalǵan № 33 orta mektep salyndy. Bul «Úrkerdegi» jalǵyz orta mektepte úsh aýysym boıynsha oqytý problemasyn tolyqtaı sheshýge múmkindik týǵyzdy. Qazir Nazym Hıkmet kóshesiniń boıynda taǵy bir mekteptiń qurylysy júrgizilip jatyr. Al Qojabergen jyraý kóshesinde taǵy bir balabaqsha salyna bastady.
Elorda ortalyǵynyń ár tusyna qatynaıtyn avtobýstar sany jyldan-jylǵa kóbeıtilip, beseýge jetkizildi. Qala ákimdigi aldaǵy jyly «Úrkerge» baratyn jeńil relsti kólik jelisiniń qurylysyn bastaýdy josparlap otyr.
«Úrkerde», negizinen, jeke úılerde turyp jatqan bir myńnan astam otbasy byltyr qysta kómir jaǵý mashaqatynan birjola qutyldy. Olardyń turǵynjaılary jalpy uzyndyǵy 88 kılometrdeı magıstraldy gaz qubyryna qosyldy. Bıyl taǵy 87,7 kılometr gaz qubyry tartylyp bitýge jaqyn. Osy ıgi is kelesi jyly tolyq aıaqtalýǵa tıis. Nátıjesinde, shaǵyn aýdannyń ekologııalyq jaǵdaıy jaqsaryp, kúzgi-qysqy jylytý maýsymynda keshkilikte kóshelerdi tumshalap turatyn qalyń tútin birshama azaıdy.
Alaıda, «Úrkerdegi» áskerı qalashyqtaǵy birqatar úı magıstraldy gaz qubyryna qosylmaı, áli de kómir jaǵyp otyr. Sebebi olar – Qorǵanys mınıstrliginiń, Ulttyq ulannyń, quqyq qorǵaý organdarynyń sardarlary ýaqytsha turyp jatqan qyzmettik turǵyn úıler. Sondyqtan atalǵan memlekettik mekemeler ózderine tıesili turǵynjaıdy gazdandyrý máselesin qarastyrǵany jón. Buǵan qosa, shaǵyn aýdanda tartylǵan magıstraldy gaz qubyrynyń eleýli bóligi sary tústi syrmen boıalmaı, kóshelerdiń sánin ketirip tur. Munyń ózi qubyrdyń merziminen buryn tozýyna ákeletinin de eskergen jón.
Bıyl úrkerlikterdiń úılerin ortalyqtandyrylǵan káriz jelisine qosý jumysy jalǵasty. Munda keıingi jyldary 14,4 kılometr káriz qubyry tartylyp, jańa káriz-sorǵy stansalary salyndy. Bul sharýa da shaǵyn aýdannyń ekologııalyq jaǵdaıyn jaqsartýmen qatar, turǵyndar úıleriniń janyndaǵy ájetqudyqtardy tazalaýǵa jumsaıtyn qyrýar qarjysyn únemdeýine septigin tıgizdi.
«Úrker» shaǵyn aýdany turǵyndarynyń sheshimin kútken máseleleri de az emes. Mysaly, qazir turǵyndarynyń sany 36 myńǵa taqaǵan turǵynjaı alabynda áli kúnge Halyqqa qyzmet kórsetý ortalyǵy joq. Ekinshi deńgeıli bankter de munda óz bólimshelerin ashýǵa asyǵar emes. Saldarynan úrkerlikter ártúrli sharýamen elorda ortalyǵyna shapqylap, ýaqyty men qarjysyn shyǵyndap júr.
«Úrkerde» ashyq aspan astyndaǵy jazǵy sahnadan basqa, Mádenıet úıi de joq. Sol sebepti shaǵyn aýdanda mádenı-kópshilik is-shara ótkizetin oryn tabý qıyn. Turǵyndar ózderiniń mádenı suranystaryn qanaǵattandyrý úshin qala ortalyǵyna saparlaýǵa májbúr.
Taǵy bir nazar aýdararlyq jaıt – «Qazposhta» aksıonerlik qoǵamynyń poshta bólimshesi bolmaǵandyqtan, úrkerlikterdiń kóbi gazet-jýrnalǵa jazylmaıdy. О́ıtkeni, jazylǵan merzimdi basylymdary qoldaryna ýaqtyly tımeıdi. Búgingi «Úrkerdiń» jaryǵy men kóleńkesi, mine, osyndaı.