Elorda ákimi Jeńis Qasymbek qalada salynyp jatqan medısınalyq mekemelerdiń qurylys barysymen tanysty, dep jazady Egemen.kz.
Keıingi jyldary Astanada 21 medısınalyq nysan paıdalanýǵa berilgen. Dese de jyl saıyn turǵyndar sanynyń ósýine baılanysty medısınalyq mekemelerge suranys artyp keledi.
Suranysty óteý maqsatynda osy jyldyń sońyna deıin «Nurly jol» temirjol vokzalynyń janynda aýysym saıyn 350 kelýshini qabyldaýǵa qaýqarly jekemenshik klınıka ashý josparlanǵan. Klınıka turǵyndarǵa memlekettik tapsyrys sheńberinde medısınalyq kómek kórsetedi.
Al keler jyly «Samuryq-Qazyna» qorynyń qarajaty esebinen №2 qalalyq kópsalaly aýrýhanasynda qabyldaý-dıagnostıkalyq kesheniniń, Saryarqa aýdanynda 250 oryndyq perınataldyq ortalyqtyń qurylysy aıaqtalady.
Sondaı-aq Ulttyq shuǵyl medısınany úılestirý ortalyǵynda balalarǵa arnalǵan 200 oryndyq travmatologııa ortalyǵy salynady.
«Aldaǵy úsh jylda 11 densaýlyq saqtaý nysanyn salý josparlanyp otyr. Almaty aýdanynda perınataldyq ortalyq, jańa zamanaýı kópsalaly aýrýhana, jańa ári tolyqqandy 6 emhana (ekeýi – memlekettik) jáne jedel medısınalyq kómek kórsetetin 3 qosalqy stansııa paıdalanýǵa beriledi», dedi Jeńis Qasymbek.