ASTANA. 22 naýryz. Qazaqstan Respýblıkasynyń Ulttyq Paralımpıalyq komıtetiniń (QR UPK) prezıdenti bolyp Qaırat Boranbaev saılandy. Bul týraly QR Mádenıet jáne sport mınıstrliginiń baspasóz qyzmeti habarlady.
Osyǵan qatysty ótken basqosýda elimizdiń Mádenıet jáne sport mınıstri Arystanbek Muhamedıuly Komıtettiń burynǵy prezıdenti Darhan Qaletaevqa istegen jumysy men paralımpıalyq qozǵalystyń damýyna qosqan úlesi úshin alǵys aıtty. Sondaı-aq, mınıstr balalar men jasóspirimder sportyn damytý jolynda ter tókken Qaırat Boranbaevtyń biliktiligin joǵary baǵalap, jumysyna sáttilik tiledi. Aıta keteıik, Darhan Qaletaev búginde elimizdiń velosport federasııasynyń prezıdenti. Sondaı-aq, Qaırat Boranbaevtyń «Qaırat» fýtbol klýby baqylaýshylar keńesiniń tóraǵasy ekeni belgili.
Qazirgi tańda UPK Halyqaralyq Paralımpıalyq komıtetiniń aımaqtyq ókili Azııa Paralımpıalyq komıtetine, Ampýtanttar men arbalylardyń federasııasyna jáne Múmkindikteri shekteýli adamdardyń búkilálemdik voleıbol uıymyna múshe. Sondaı-aq, Výokattı sport ınstıtýty (Fınlıandııa), Dýbaı múgedekter klýby (BAÁ), Múgedekterdiń atýdan klýby (Ulybrıtanııa), «Start» múgedekter sport klýby (Polsha) syndy uıymdarmen áriptes retinde tyǵyz baılanys ornatqan.
Sońǵy ýaqytta UPK-de sportshylardy arnaıy sporttyq qurylǵylarmen, arbalarmen jáne protezdermen qamtamasyz etý boıynsha aıtarlyqtaı jumystar atqaryldy. 2013-2015 jyldar aralyǵynda elimizdegi múmkindigi shekteýli sportshylar 28 halyqaralyq saıysqa qatysyp, 74 altyn, 102 kúmis jáne 104 qola medal, jalpy sany 280 júlde oljalady.
Atalǵan komıtet qazirgi kezde 2016 jyly Rıo-de-Janeıroda ótetin jazǵy Paralımpıalyq oıyndarǵa qyzý daıyndalýda. Respýblıka boıynsha UPK-nyń 12 aımaqtyq fılıaly jumys isteıdi. Jýyrda taǵy bir fılıaldy iske qosý josparlanýda.
Elaman Qońyr.
Derek, sýret: QR Mádenıet jáne sport mınıstrliginiń baspasóz qyzmeti