Qarasaı aýdanynda Almaty oblysy ákiminiń kýbogine arnalǵan eresekter arasyndaǵy komandalyq kókpar lıgasynyń «Batys óńirlik kezeńi» ótti. Saltanatty is-shara shymyldyǵy ulttyq bı ansambli men jergilikti ónerpazdardyń ulttyq rýhty aspandatqan konserttik baǵdarlamasymen bastaldy.
«Kókpar – jaı ǵana ulttyq sport emes. Bul – bizdiń tarıhymyzdyń qaınary, erlik, eptilik pen birliktiń rámizi. Búgin Qarasaı aýdanyna eń myqty oıynshylar óz sheberligin, jeńiske degen jigerin, halqymyzdyń sporttyq dástúrlerine degen qurmetin kórsetýge jınaldy. Mundaı saıystar buqaralyq sportty damytýǵa, ulttyq sport túrlerin nasıhattaýǵa, jastardy patrıotızm men salamatty ómir saltyna tárbıeleýge yqpal etedi. Sportshylarǵa sáttilik, ádemi ári ádil oıyn, tózim men jiger tileımin», dedi oblystyq Dene shynyqtyrý jáne sport basqarmasynyń basshysy Aqjúrek Tańatarov.
Bıylǵy sáýir aıyndaǵy «Dene shynyqtyrý jáne sport týraly» zańǵa engizilgen túzetýlerge sáıkes, ulttyq sport túrleri olımpıadalyq sportpen qatar, resmı túrde basym baǵyt retinde tanyldy.
«Búginde elimizde ata-baba sportyn damytý jolynda keleli ister qolǵa alyndy. Qarjylandyrý, ınfraqurylym, maman daıarlaý – munyń barlyǵy ulttyq sport túrlerin jańa sapalyq deńgeıge kóterýge múmkindik beredi», dedi Almaty oblysy ulttyq sport túrlerin damytý dıreksııasynyń dırektory Eldos Tilebaldıev.
Komandalyq kókpar lıgasy bizdiń óńirde alǵash ret ótkizilip otyr. «Batys óńirlik kezeńge» 5 komanda qatysty. Jalpy 60-tan astam sportshy ózderiniń at ústindegi sheberligin, taktıkalyq daıyndyǵyn kórsetti. Sonymen qatar komandalyq kókpardyń kórigin qyzdyrǵan tulparlardyń tózimdiligi men ulttyq oıynǵa erekshe beıimdiligi kórermen nazaryn aýdartty.
Jarystyń bas tóreshisi Sábıt Qasenov komandalyq kókpar – naqty taktıkalyq josparǵa qurylǵan, zamanaýı sporttyq saıys ekenin, mundaı format iri týrnırlerdi júıeli ótkizýge, sportshylardy kásibı deńgeıde daıyndaýǵa, jastar arasynda at sporty mádenıetin damytýǵa múmkindik beretinin tilge tıek etti.
Baıraqty básekede Qarasaı aýdanynyń komandasy jeńiske jetti. Fınaldyq saıysta olar Jambyl aýdanynyń kókparshylarynan basym tústi. Al týrnırdiń qola júldesi «Kemertoǵan» komandasyna buıyrdy.
Eske sala keteıik, qatysýshylar fınaldyq kezeńge joldama úshin baq synady. Onda batys jáne shyǵys óńirleriniń eń úzdik komandalary kezdesedi. «Almaty oblysy ákiminiń kýbogine arnalǵan komandalyq kókpar lıgasynyń shyǵys óńirlik kezeńi» 26–29 qarasha aralyǵynda ótedi. Al fınaldyq kezeń osy jyldyń jeltoqsan aıyna josparlanǵan.
Jeńimpazdar men júldegerler dıplomdarmen, medaldarmen, kýboktarmen, sondaı-aq aqshalaı syılyqtarmen marapattalady.
Kókpar oıyny Almaty oblysynyń dene shynyqtyrý jáne sport basqarmasynyń, oblystyq sportty damytý ortalyǵynyń, ulttyq sport túrlerin damytý dıreksııasynyń jáne «Alataý» oblystyq kókpar federasııasynyń qoldaýymen ótkizildi.
Almaty oblysy