Sóz ben saz qustyń qos qanatyndaı birin-biri tolyqtyryp, egiz qozydaı jamyrasyp-jarasyp jatsa, týyndyger muratynyń oryndalǵany emes pe? О́leńnen ózine tán órnek izdegen Oljas Otar boıyna sóz ben saz qýatyn qatar qondyryp, kóptiń yqylasyna bólenip júrgen jan. Ony jurt estradadaǵy el júregine jol tapqan tanymal án mátinderiniń avtory retinde, aıtys sahnasynda oramdy oı aıtqan aqyn retinde biledi.
Qanynda bar qazaqqa jyr tań emes desek te, óleń ólkesine at baılap, ónerden óris tapqan azamattyń arǵy jaǵyn qaza túskende el aýzynda jıi aıtylatyn: «Alys aýyl arasyn jaqyn qylǵan naǵashy, aqkóńildi balasyn aqyn qylǵan naǵashy», degen joldar oıǵa oralady. Oljastyń án men jyrǵa jaqyn bolýyna týǵan jer, ósken orta, sińirgen tárbıemen qatar aıtys sahnasynda mańǵaz maqamymen tanylǵan Shorabek Aıdarovtyń, sol sekildi Asqarbek Aıdarov, Rafael Nııazbekov syndy sóz ustaǵan naǵashylarynyń áseri bolǵanǵa uqsaıdy.
– Rýhanı bolmysymyzdyń baǵdaryn aıqyndap beretin bala kúngi áserler eken ǵoı. Taı minip, asyq oınaǵan aýyl balasymyz. Ájelerimizdiń ónegesin sińirip óstik. Apam Máıke Aıdarova júrgen jerin dýmanǵa bóleıtin, toıǵa barsa toı bastaıtyn, qara óleńge kelgende eshkimge des bermeıtin rýhanı qýaty myqty adam edi. Sol kisiden alǵanym kóp. Balań kóńilmen jazǵan alǵashqy óleńderime naǵashym Rafael Nııazbekov jaqsy baǵa berip kótermelese, týǵan naǵashym Shorabek Aıdarov meni aıtys ónerine baýlydy. Olardyń ónegesi ózime úlken mektep. Solardyń alǵaýynan bala armanymyzǵa ot jaqtyq, alysty kózdedik, ónerge keldik, ómirge talpyndyq. Ádebıet pen óner adam janyn baıytatyn sıqyrly kúsh, – deıdi keıipkerimiz.
1991 jyly alǵash aıtys sahnasyna shyqqan Oljas Otar kúni búginge deıin talaı jyr dodasynda oza shaýyp, asyǵy alshysynan tústi. 1998 jyly Qyzyljar qalasynda ótken respýblıkalyq aıtysta úzdik óner kórsetip, 2002 jyly stýdent jastar arasynda uıymdastyrylǵan «Jas tolqyn» atty respýblıkalyq aıtystyń I oryn ıegeri atandy. Abaı Qunanbaıuly men Jambyl Jabaevtyń 150 jyldyq, Muhtar Áýezovtiń 100 jyldyq mereıtoılaryna baılanysty ótkizilgen aımaqtyq aqyndar alamanynyń alǵy shebinen kórindi. 2005 jylǵy «Jasampaz eldiń erteńi – jastar» aıtysynda, 2006 jyly ótken «Jeltoqsandy jyrlaımyn» atty oblystyq aqyndar aıtysynda júldegerler qatarynan tabyldy. 2016 jyly Almaty qalasynyń 1000 jyldyǵyna arnalǵan «Myń jasaǵan shahar» atty halyqaralyq aqyndar aıtysynda úzdik óner kórsetip arnaıy júldeni, 2017 jyly «Týǵan jer – altyn tuǵyrym» atty respýblıkalyq aqyndar aıtysynda III oryndy enshiledi. Túrkııanyń Ystanbul qalasynda ótken halyqaralyq aqyndar aıtysyna elimizden joldama alǵan 6 aqynnyń biri bolyp baryp, sheteldegi qazaqtardyń alǵysyn arqalap qaıtqany da bekzat ónerdiń sharapaty. Aıtystyń arqasynda eki márte óner jáne qoǵam qaıratkerleriniń qatarynda qasıetti Mekke-Mádınaǵa tabany tıgeni de bir mereı.
Oljastyń shyǵarmashylyǵy jastarmen úndes, sebebi ol sol urpaqtyń úni men tynysyn dóp sezinedi. Ásirese patrıottyq rýhtaǵy ánderi, mahabbat lırıkasy men ómir shyndyǵyn arqaý etken týyndylary el arasynda keń taralǵan. О́zi sózi men ánin jazǵan «Shyda, júrek», «Jyldar men joldar», «Ana-Áke», «Aǵa», «Aǵaıyn», «Balalyq shaq» sekildi týyndylaryn tyńdarman jyly qabyldaǵanyna qaramastan, «О́zimdi pálendeı sazger retinde sezinbeımin. Bálkim áýesqoılyq shyǵar. Qannan berilgen qasıet qoı, tamyryńda búlkildep, jazbasyńa qoımaıdy», deýin keıipkerimizdiń qarapaıymdylyǵyna baladyq.
Onyń júrek qylyn shertetin juqa-jumsaq lırıkasy ásem ánmen jymdasqanda kóńil terbeıdi. Ol sózin jazǵan ánder, jastar júregin jaýlap, talaı ánshiniń juldyzyn jaqty. Atap aıtqanda, «Aqtamaq», «Umyttyń ba?», «Qanatyńnyń túsi», «Kóriskenshe meniń, aıaýlym», «Aq bulttar», «Sen jaıly», «Aq qusym», «Tarazdyń arýlary» jáne basqa ánderdi qazaq estradasynyń tanymal ánshileri Baǵdat Sámedınova, Elmura Jańabergenova, Muqasan Shahzadaev, Saıat Medeýov, Dosymjan Tańatarov, Qurmash Mahan, Abaı Begeı, Indıra Rasylhan, Juldyzaı Dúısenbıeva, Mádına Saǵynbekova, Maralbek Babaqulov, Ǵanı Mátebaev, Qaırat Nurtas, Ernar Aıdar, Serjanáli Álibek, Álisher Karımov, Asyljan Túzelbek, Rınat pen Perızat, «Jalyn», «Astana», «Meloman», «Ádemi-Aı» toptary, t.b. estrada sańlaqtary oryndap júr. 2011 jyly respýblıkalyq «El arna» telearnasynyń uıymdastyrýymen ótken «Saz álemi» baǵdarlamasynda Qaırat Nurtastyń oryndaýymen «Jyldyń úzdik áni» atanǵan «Aýyrmaıdy júrek» ániniń sózin jazǵan avtor retinde ónerdegi qanattas-qalamdastary ony «Qazaqstannyń bas kardıologi» atap ketkeni bar.
Ekonomıst-qarjyger mamandyǵyn alyp, kúni búginge deıin elimizdiń Memlekettik qyzmet salasynda abyroıly eńbek etip júrgen azamat qalamnan bir sát qol úzgen emes. Oljas Otar – sóz ben sazdyń jarasymyn ǵana emes, ulttyq rýh pen zamanaýı oıdy qatar órip, jańa býyn óner ıelerine jol ashyp júrgen azamat. Sazgerlermen úılesimdi tandem qura otyryp, sahnaǵa jańa lep ákelgen avtordyń shyǵarmashylyǵy – búgingi qazaq mádenıetiniń kórkem bir paraǵy desek, artyq aıtqandyq bolmas.
Jeltoqsannyń 9-y kúni, Respýb-lıka saraıynda Oljekeńniń «Aýyrmaıdy júrek» atty jeke shyǵarmashylyq án keshi ótpek. Kesh aıasynda aqynnyń sózine jazylǵan eń tańdaýly ánder men jańa týyndylar alǵash ret kópshilikke usynylady. Sahna tórinde qazaq estradasynyń eń tańdaýly ókilderi: Maıra Ilıasova, Baǵdat Sámedınova, Talǵat Kúzembaev, Muqasan Shahzadaev, Qurmash Mahan, Saıat Medeýov, Dosymjan Tańatarov, Qaırat Nurtas, Ernar Aıdar, Álisher Karımov, Baýyrjan Isaev, Abaı Begeı, Aqbota Kerimbekova, Indıra Rasylhan, Juldyzaı Dúısenbıeva, Qanat pen Sveta, Toqtar men Beıbit, Mıras pen Quralaı, «Astana», «Melomen», «Ádemi-aı» toptary, taǵy da basqa óner juldyzdary án shyrqaıdy. О́ner men sezim toǵysqan kesh – avtordyń tynymsyz shyǵarmashylyq eńbeginiń jemisi.
ALMATY