Premer-mınıstrdiń orynbasary – Ulttyq ekonomıka mınıstri Serik Jumanǵarın Túrikmenstan Mınıstrler kabıneti tóraǵasynyń orynbasary Hodjamyrat Geldımyradovpen kezdesti.
Vıse-premer Túrikmenstan Qazaqstannyń Ortalyq Azııadaǵy mańyzdy áriptesi ekenin atap ótti. Keıingi bes jylda eki el arasyndaǵy taýar aınalymy tórt ese ósken, al keıingi eki jyldaǵy ózara saýda turaqty túrde 500 mln dollardan asyp tur. Memleket basshylary alǵa qoıǵan taýar aınalymyn 1 mlrd dollarǵa deıin jetkizý maqsatyn ortamerzimdi perspektıvada erkin oryndaýǵa bolady.
Kelissózderdiń jeke bir blogi aýyl sharýashylyǵy ónimderiniń ózara saýdasyna arnaldy. 2025 jylǵy 9 aıda Túrikmenstanǵa elimizden eksport negizinen ónerkásip, aýyl sharýashylyǵy, qaıta óńdelgen ónimderdi jetkizý esebinen 221,7 mln dollardy quraǵan. 2025 jyly eksport un, ósimdik maıy, taǵy basqa da óńdelgen taýarlardyń kóbeıýine baılanysty ósti.
Eksporttaǵy agroónerkásip taýarlarynyń úlesi turaqty túrde 30%-dan asady. Qazaqstan bıdaı uny, kúnbaǵys maıy, bıdaı, makaron ónimderi, margarın, shaı konsentrattaryn jetkizedi.
Serik Jumanǵarın taýarlardy jetkizý kólemin ulǵaıtýdy, sondaı-aq bıdaı, júgeri, jasymyq, burshaq, soıa, kúnbaǵys maıy, un, qant jáne basqa da ónimderden turatyn agroónerkásip óniminiń túrlerin kóbeıtýdi usyndy.
Túrikmenstannan ımport ta ósip otyr. 2025 jylǵy 9 aıda ol 141,9 mln dollarǵa jetti. Tabıǵı gazdan basqa jemister men kókónister de jetkiziledi. 2025 jyly qyzanaq kólemi 30 myń tonnadan asty, ol – Túrikmenstannan keletin ımport qurylymyndaǵy ekinshi mańyzdy taýar.
«Biz jemis-kókónis ónimderiniń bizdiń naryqta bolǵanyna múddelimiz. Sizder jetkizetin barlyq nárse – qyzanaq, jemis, kókónisti biz «jasyl dáliz» aıasynda qabyldaýǵa daıynbyz», dep atap ótti S.Jumanǵarın.
Kezdesýde kólik-logıstıkalyq jobalardy damytýǵa erekshe nazar aýdaryldy. Hodjamyrat Geldımyradov Geratpen shekarada qurǵaq port qurylysynyń bastalǵany týraly habarlady jáne Qazaqstandy osy jobaǵa qosylýǵa shaqyrdy.
Taraptar sondaı-aq «Gerat – Týrgýndı» temirjol jelisiniń qurylysyn qosa alǵanda, Qazaqstan – Túrikmenstan – Aýǵanstan – Pákistan tranzıttik dálizin qalyptastyrý perspektıvalaryn talqylady. Serik Jumanǵarın men Hodjamyrat Geldımyradov bıznes úshin qosymsha múmkindikter jasaýǵa, elder arasyndaǵy ıntegrasııany keńeıte otyryp, kólik, saýda jáne logıstıkalyq baılanystardy damytý jónindegi jumysty jalǵastyrýǵa nıetti ekenin rastady.