Internet alaıaqtyǵy kúrt kóbeıdi. Alaıaqtar halyqty aldaý úshin túrli tásil qoldanady. Sol shemalardyń eń jıi taraǵany – dropperlerdi paıdalaný, dep jazady Egemen.kz.
Abaı oblysy polısııa departamentiniń kıberqylmysqa qarsy kúres basqarmasynyń jedel ýákili Áset Egeýbaev dropperliktiń qandaı qaýip tóndiretinin túsindirip berdi.
«Dropper degenimiz – óz atyna bank kartasyn nemese onlaın ámııan ashyp, ony bóten adamǵa paıdalanýǵa beretin tulǵa. Bul kartalar kóbine urlanǵan aqsha men zańsyz operasııalardy jasyrý úshin qoldanylady. Kóp adam karta berýdi qarapaıym kómek dep qabyldaıdy. Biraq kartańyzdy bóten adamǵa berseńiz, siz sol adamnyń jasaǵan qarjylyq qylmysyna qatysqan bolasyz. Bul jaı ǵana abaısyzdyq emes, tikeleı qylmystyq shemaǵa qosylý» dedi ol.
Dropper bolýdyń saldary aýyr. Qoldanystaǵy zań boıynsha kartasyn bergen adam mindetti túrde jaýapkershilikke tartylady. Tergeý barysynda dropperdiń áreketi alaıaqtyqqa kómektesý, aqshany zańdastyrýǵa qatysý nemese qylmystyq toptyń bir bóligi retinde qaralýy múmkin. Qandaı jaǵdaıda da is qylmystyq sıpatta bolady jáne jazanyń túri jeńil emes. Aıyppul kólemi úlken bolýy yqtımal. Sonymen birge bostandyǵyn shekteý jazasy nemese aýyr jaǵdaıda bas bostandyǵynan aıyrý jazasy da qoldanylady.
«Kartańyzdy paıdalanýǵa berseńiz, ol karta arqyly jasalǵan kez kelgen zańsyz aýdarym sizdiń atyńyzǵa tirkeledi. Tergeý aldymen karta ıesin tabady. Sol kezde eshteńeden habarsyzbyn deý jaýapkershilikten qutqarmaıdy. Bul óte aýyr saldary bar áreket. Muqııat bolý kerek. Bóten adamnyń ótinishimen karta ashý, daıyn kartańyzdy berý, shotyńyzdy paıdalanýǵa ruqsat etpeńiz. Neǵurlym qaýipsiz sheshim – kartańyzdy eshkimge bermeý, kúmándi usynystardan bas tartý jáne qarjylyq derekterińizdi qorǵaý. Bank kartasy tek sizdiki. Ony bóten adamǵa berý óz bolashaǵyńyzǵa qaýip tóndirýmen teń», dep túsindirdi Á. Egeýbaev.