Elordada ótken dóńgelek ústelde áskerı qyzmetshilerdiń quqyqtary, áleýmettik kepildikteri, áskerdiń jaýyngerlik daıyndyǵy men qoǵammen ózara baılanysyn nyǵaıtý máseleleri kóterdi. Jıynǵa Senat pen Májilis depýtattary, memlekettik organdar men kúshtik qurylymdardyń, qoǵamdyq uıymdardyń ókilderi men sarapshylar qatysty, dep habarlaıdy Egemen.kz.
Qorǵanys mınıstri, avıasııa general-leıtenanty Dáýren Qosanov vedomstvo júrgizip jatqan basym baǵyttar jóninde baıandap, jaýyngerlik daıyndyqty jetildirý, ınfraqurylymdy jańartý, zamanaýı qaýipsizdik standarttaryn engizý jáne sıfrlandyrý úderisteri jóninde egjeı-tegjeıli toqtaldy. Onyń aıtýynsha, áskerge shaqyrý rásiminiń ashyqtyǵyn qamtamasyz etý jáne áskerı qyzmettiń qaýipsiz ortasyn qalyptastyrý úshin Parlamentpen, qoǵammen jáne ata-analar qoǵamdastyǵymen turaqty ári tıimdi baılanys qajet.
Mınıstr merzimdi qyzmet atqaryp júrgen sarbazdarmen jumysty kúsheıtýge erekshe mán beriletinin atap ótti. Komandırlerdi daıarlaý talaptary kúsheıtilip, normatıvtik-quqyqtyq baza jetildirilip, áskerı qyzmetshilerdiń otbasylarymen baılanys artyp keledi.
Jıyn barysynda áleýmettik qoldaý tetikteri de usynyldy. Bıyl 2710 sarbaz bilim granttaryna ıe bolǵan, al 20 myńnan astam áskerı qyzmetshi jalpy somasy 8 mlrd teńge bolatyn kredıttik demalysqa qol jetkizgen. Sonymen qatar «Smart voenkomat», Jauynger, Sarbaz 2.0, Askeri Ziyat sııaqty sıfrlyq bastamalar men Arnaıy operasııalar kúshterine arnalǵan jańa kıim úlgileri tanystyryldy.
Senat depýtaty Bıbigúl Jeksenbaı Qorǵanys salasynda áskerı ombýdsmen ınstıtýtyn engizý máselesin qarastyrýdy usyndy. Onyń pikirinshe, mundaı tetik áskerı orta, qoǵam jáne Parlament arasyndaǵy baılanysty nyǵaıtyp, azamattardyń jáne sarbazdardyń ótinishterine der kezinde jaýap berýge múmkindik beredi.
Qoǵamdyq uıym ókilderi resmı ári ashyq kommýnıkasııanyń mańyzyn atap ótti. «Analar júregi» sarbaz analary komıtetiniń jetekshisi Lılııa Haırýllına shynaıy aqparattyń qoǵamdaǵy senimdi nyǵaıtyp, jalǵan aqparattyń taralýyna tosqaýyl bolatynyn jetkizdi.
Talqylaýǵa Qazaqstan halqy Assambleıasynyń músheleri, áskerı sarapshylar jáne BAQ ókilderi de atsalysty. «Aıqyn» gazetiniń bas redaktory Amangeldi Qurmet aqparattyq keńistikte áskerı salaǵa qatysty oń kózqaras qalyptastyrý úshin júıeli jumys qajet ekenin aıtty.
Májilis depýtattary bıyl qabyldanǵan áskerı-patrıottyq tárbıe, aýmaqtyq qorǵanys jáne rezervtik qyzmetke qatysty úsh mańyzdy zańdy eske sala otyryp, zańnamany jetildirý kerek ekenin atap ótti.
Ardagerler – Halyq qaharmany general-leıtenant Baqytjan Ertaev pen general-maıor Marat Naǵumanov – jeke qurammen jumys júrgizý boıynsha óz tájirıbelerin bólisip, birqatar usynystaryn ortaǵa saldy.
Dóńgelek ústel formaty memlekettik organdar, kúshtik qurylymdar jáne qoǵamdyq uıym ókilderiniń ortaq ustanymdaryn biriktirýge múmkindik berdi. Jıyn qorytyndysy boıynsha áskerı qyzmetshiler men olardyń otbasylaryn áleýmettik qorǵaýdy kúsheıtý, qyzmet jaǵdaılaryn jaqsartý jáne jastardy áskerı-patrıottyq tárbıeleý salasynda zań shyǵarýshylardyń, memlekettik organdar men qoǵamnyń birlesken jumysyna baǵyttalǵan birqatar usynystar ázirlendi