2025 jyldyń on aıynyń qorytyndysy boıynsha Qazaqstan ekonomıkasy 6,4 paıyz ósim kórsetti. Bul halyqaralyq uıymdar kútken deńgeıden joǵary ári álemdik JIО́ ósiminen eki ese artyq. Sarapshylar muny ishki suranystyń artýy, ınvestısııalyq belsendiliktiń kúsheıýi jáne negizgi salalardyń qalpyna kelýimen baılanystyrady, dep habarlaıdy Egemen.kz.
Ekonomıkanyń oń dınamıkasy qyzmet kórsetý, saýda, ónerkásip, aýyl sharýashylyǵy jáne qurylys sektorlarynda aıqyn baıqalady. Naqty sektordaǵy óndiristiń ulǵaıýy, qýattardy jańartý jáne jańa jobalardyń iske qosylýy jalpy ósimge aıryqsha úles qosty. О́nerkásip salasy 7,3 paıyz ósim kórsetip, jalpy ishki ónimniń 30 paıyzdan astamyn qamtamasyz etti. Saýda jáne kólik salalarymen birge bul baǵyttar JIО́ ósiminiń 70 paıyzyna jýyǵyn qurady.
Salalar boıynsha ósim kelesideı: transport jáne qoımalaý — 20,7 paıyz, qurylys — 15,1 paıyz, ónerkásip — 7,3 paıyz, saýda — 9 paıyz, aýyl sharýashylyǵy — 5,4 paıyz, baılanys — 4 paıyz. Taý-ken óndirý salasy 9,6 paıyzǵa, óńdeý sektory 5,8 paıyzǵa artty. О́ńdeý ónerkásibinde mashına jasaý 11,5 paıyz, onyń ishinde, hımııa ónerkásibi 10,9 paıyz, tamaq óndirisi 9,1 paıyz, munaı óńdeý 6,3 paıyz, metall buıymdary óndirisi 14,1 paıyz, qurylys materıaldary óndirisi 5,3 paıyz ósim kórsetti.
OECD boljamyna sáıkes, bıyl álemdik ekonomıkanyń ortasha ósimi 3,2 paıyz deńgeıinde kútiledi. Qazaqstan bul kórsetkishten eki esege jýyq joǵary qarqyn kórsetip otyr. Mundaı serpin el ekonomıkasynyń kópvektorly ári dıversıfıkasııalanǵan modelge kóship kele jatqanyn aıǵaqtaıdy.
Ekonomıkanyń turaqty ósýine «Samuryq-Qazyna» ulttyq ál-aýqat qorynyń iri ınfraqurylymdyq jáne tehnologııalyq jobalary da aıtarlyqtaı yqpal etip otyr. Qor tobynyń 2025 jylǵa arnalǵan ınvestısııalyq portfeli jalpy somasy 50 trln teńgeden asatyn 130 jobany qamtıdy. Onyń ishinde 33,3 trln teńge munaı-gaz, energetıka, kólik-logıstıka, qurylys jáne ózge de salalardaǵy 46 jańa iri bastamaǵa baǵyttalǵan.
Jobalardyń arasynda «Jasly mektep» ulttyq pılottyq jobasy (1,4 trln teńge), energetıkadaǵy 18 joba (10,3 trln teńge), 5G jelisin salý (536,9 mlrd teńge), «NINT» AEA ınfraqurylymyn damytý (619 mlrd teńge) jáne «Moıynty — Qyzyljar» temirjol jelisiniń qurylysy (566 mlrd teńge) bar.
2024 jyldyń qorytyndysy boıynsha qor aktıvteri 41,1 trln teńgege jetip, bir jylda 11,3 paıyzǵa artty. Bul — sońǵy toǵyz jyldaǵy eń joǵary kórsetkish. Túsim 16,4 trln teńgege (+6,5%), menshikti kapıtal 25,6 trln teńgege (+17,7%), al taza paıda 2,4 trln teńgege (+38,6%) deıin ósti. Qor kompanııalarynyń óndiristik nátıjeleri de jaqsardy: shıki munaı satý 1,2 paıyzǵa, júk tasymaly 11,4 paıyzǵa, ýran ónimi 23,3 paıyzǵa, affınırlengen altyn 55 paıyzǵa, telekommýnıkasııalyq qyzmetter 9,4 paıyzǵa artty.
Qordyń tabysy ekonomıkany odan ári jańǵyrtý men ártaraptandyrýǵa qaıta ınvestısııalanýda. Korporatıvtik basqarýdy jetildirý, táýelsiz dırektorlardyń róli men ashyqtyqtyń artýy, halyqaralyq tájirıbelerge beıimdelý qor toptary arasyndaǵy sınergııany kúsheıtip, tıimdilikti arttyrýǵa múmkindik berip otyr.