Qalamgerdiń qomaqty kitaby

Shymkenttegi «Qyzǵaldaq» saraıyn­da ótken kitaptyń tusaýkeser rásimi bel­gili aqyn, «Alash» syılyǵynyń laý­rea­ty Narmahan Begalyulynyń aq batasy­men ashyldy. Saltanatty is-sharaǵa respýblıkaǵa tanymal memleket jáne qo­ǵam­ qaıratkerleri, zııaly qaýym ókilderi men qalamgerler qatysty. Al kitaptyń tusaýyn Parlament Senatynyń depýtaty Darhan Qydyráli, «Qazaq gazetteri» seriktestiginiń bas dırektory Dıhan Qamzabekuly, Túrkistan oblys­tyq máslıhatynyń tóraǵasy Nuraly Ábishev,  Shymkent qalasy ákiminiń orynbasary Sársen Quranbek jáne jazýshy Marhabat Baıǵuttyń jubaıy Qyzdarkúl Pernebaıqyzy kesti.

Osy saltanatty keshte Ǵ.Elshibaı Jýr­nalıster akademııasynyń tolyq múshesi (akademık) atandy. Mártebeli ataqty Eýrazııa ulttyq ýnıversıteti Jýr­nalıstıka máselelerin zertteý ınstı­týtynyń dırektory Qaırat Saq pen Qazaqstannyń eńbek sińirgen qaıratkeri Sandybaı Aıaǵan tapsyrdy. Sonymen birge Túrkistan oblystyq máslıhatynyń depýtaty qyzmetin atqaryp júrgen qalam­ger Ǵalymjan Elshibaı Senat tóraǵasy Máýlen Áshimbaevtyń Qurmet gramotasymen marapattaldy.

Alqaly jıynda Ulttyq ǵylym aka­demııasynyń akademıgi, J.Táshenov ýnı­versıteti dırektorlar keńesiniń tóraǵasy Ońalbaı Aıashev, M.Áýezov atyndaǵy Oń­tústik Qazaqstan ýnıversıteti О́z­bekstan fılıalynyń rektory­ Darııa Perneshqy­zy, Túrkistan obly­sy­nyń qurmetti aza­maty Sozaqbaı Ábdi­qulov sóz sóılep, ki­tap avtorynyń shyǵarmashylyǵyna qatys­ty oı-pikirlerin bildirdi. Keshti belgili aqyn, ǵalym, baspager Temirǵalı Kópbaev júrgizdi.

Jıyn barysynda Ǵ.Elshibaı jaryq kórgen alǵashqy kitabynyń mazmunymen ta­nystyrdy. Jýrnalıstıka salasynda otyz jyldan astam ter tókken qalam­gerdiń 50 jyldyq mereıtoıy aıasyn­da­ǵy eńbegi eken. Jınaqqa Ǵalymjan Qamyt­bekulynyń aýdandyq, oblystyq, respýb­lı­kalyq basylymdarda ár jyldary ja­rııalanǵan maqala, suhbattary enip otyr. Onda tuǵyrly tulǵalar týraly tanymdyq-zertteý maqalalary, ulttyq qundylyqtar, ata dástúr, til, din, saıası taqyryptaǵy sarap­tamalar, ult rýha­nııaty týraly pýblı­sıstıkalyq shyǵar­malar, móltek sezim­de­riniń syrlaryn shertken jyrlary top­tastyryldy. Má­selen, «Tuǵyrly tul­ǵa­lar» taraýy Turar Rysqulov, Sul­tanbek Qojanov, Názir Tórequlov, Nur­tas Ońda­synov, Dinmuhamed Qonaev, Asan­baı Asqa­rov syndy qazaqtyń birtýar per­zent­teriniń ómirine qatysty zertteýlerge arnalǵan.

Tólebı aýdany Qasqasý aýylynyń týmasy Ǵalymjan Elshibaı Qazaq ult­tyq ýnıversıtetiniń jýrnalıstıka fakýltetin úzdik bitirgen. Alǵashqy eń­bek joly aýdandyq «Tólebı týy» gazetinde bastaldy. «Shymkent kelbeti», «Ońtústik Qazaqstan» gazetterinde jemisti eńbek etti. Respýblıkalyq «Jas Alash» gazetinde osy óńirdiń menshikti tilshisi bolyp uzaq jyldaı qyzmet atqardy. Sondaı-aq qazaq rýhanııatynyń qarashańyraq basylymdary «Ana tili» men «Qazaq ádebıeti» gazetterinde de qalam terbedi. «Eren eńbegi úshin» medaliniń ıegeri bir kezderi Qazaqstan Jýrnalıster odaǵy­nyń Túrkistan oblystyq fılıalyn da  basqardy.

ShYMKENT