Ulttyq agrarlyq ǵylymı-bilim berý ortalyǵynyń basqarma tóraǵasy Baýyrjan Asanov Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń ǵylymı áleýetin joǵary baǵalady.
Oral qalasynda ótken Qazaq-stan–Reseı óńirarlyq forýmyna kelgen qazaqstandyq JOO ókilderi ýnıversıtettiń ǵylymı zerthanalaryn aralap, atqarylyp jatqan jumystardy kórdi. «Qus sharýashylyǵy» ǵylymı-óndiristik zerthanasynda, «Veterınarlyq jáne bıologııalyq qaýipsizdik», «Taǵam qaýipsizdigi», «Qurylys materıaldary jáne tehnologııalar» ǵylymı zertteý zerthanalarynda bolyp, oraldyq ǵalymdardyń jańa ǵylymı jobalarymen tanysty.
«Qus sharýashylyǵy» ǵylymı-óndiristik zerthanasynyń qyzmetkerleri mundaǵy ınkýbator túrlerin, olarǵa jumyrtqa salý arqyly balapan alý úrdisin, balalapan ósirý tehnologııasyn kórsetti. Zerthanada ósiriletin qaz-úırekti baǵyp-kútý jaǵdaıyna nazar aýdartyp, olarǵa beriletin azyq túrleri, jasalatyn jem-shóp qospalary týraly aıtyp ótti.
«Qurylys materıaldary jáne tehnologııalar» ǵylymı zertteý ortalyǵynyń jumysyn tanystyrǵan Indýstrıaldy-tehnologııalyq ınstıtýty dırektorynyń orynbasary Sábıt Jarylǵapov ýnıversıtet ǵalymdarynyń iri qara malynyń múıizi men tuıaǵyn, shyny qaldyqtaryn kádege jaratý boıynsha ǵylymı jumystary týraly aıtyp berdi. Mundaǵy ǵylymı zertteý jumystaryna qonaqtar erekshe qyzyǵýshylyq tanytty. Mysaly, zerthanada maldyń múıiz-tuıaǵy kóbik beton óndirisinde kóbik túzgish daıyndaýǵa qoldanylsa, áınek qaldyqtary sılıkatty kirpishke nemese órnektastarǵa qosymsha qasıet beredi eken. Bul jańalyqtar ǵylymı zertteýler arqyly dáleldengen. Buǵan qosa oblys aýmaǵyndaǵy Tasqala ken ornynda kezdesetin kremnııli taý jynysy – opokadan jasandy qıyrshyq tas alý nemese atalǵan taý jynysyn qurama jemge aralastyrý boıynsha da ǵylymı zertteý jumysy biraz ýaqyttan beri júrgizilip keledi.
Ýnıversıtettegi «Ǵylym jáne tehnologııalardy kommersııalandyrý» departamentiniń dırektory, bıologııa ǵylymdarynyń doktory Indıra Beıshovanyń aıtýynsha, janýarlar genetıkasy jónindegi halyqaralyq qoǵam (ISAG) uıymdastyrǵan iri qara mal men jylqynyń genetıkalyq profılin anyqtaýǵa arnalǵan halyqaralyq salystyrmaly synaqta ýnıversıtettiń «Bıotehnologııa jáne juqpaly aýrýlardy dıagnostıkalaý» zerthanasy genetıkalyq zertteýlerdiń joǵary sapasyn rastaıtyn 1-rang mártebesine ıe bolǵan.
– Memleket basshysy ǵylym-bilim salasyna óte joǵary talap qoıyp otyr. Biz sizdermen jáne óndiris oryndarymen birlesip, sol talap-mindetti oryndaýǵa kúsh salamyz. Ǵylym salasyndaǵy jańa jobalardy, jetistikterdi ári qaraı júzege asyrýymyz kerek. Prezıdent bıylǵy Joldaýynda agrohab qurý máselesin erekshe tapsyrdy. Búgin Jáńgir han ýnıversıtetiniń mamandar daıarlaý júıesimen, ýnıversıtet ǵalymdarynyń ǵylymı zertteý jumystarymen jáne júzege asyrylyp jatqan jobalarymen jaqyn tanystyq. Osy eńbekterińiz úshin sizderge alǵys bildiremin, – dedi basqarma tóraǵasy B.Asanov.
– Biz Jáńgir han ýnıversıtetimen ǵylymı baǵytta burynnan da birlese jumys istep kelemiz. Jalpy Ulttyq agrarlyq ǵylymı-bilim berý ortalyǵyna qarasty úsh ýnıversıtet ózara áriptestik baılanysta, ortaq maqsatta jumystanyp jatyrmyz. Osy jolǵy saparymyz biz úshin óte mańyzdy boldy, – deıdi S.Seıfýllın atyndaǵy Qazaq agrotehnıkalyq zertteý ýnıversıtetiniń rektory Qanat Tireýov.
Batys Qazaqstan oblysy