Astanada ótken «Ortalyq Azııa ornyqty damýǵa arnalǵan jańa Jibek joly» forýmynda óńir elderi ornyqty damý, jasyl ekonomıka jáne ınklıýzıvti ósýdi qamtamasyz etýge baǵyttalǵan jańa óńirlik seriktestikti tanystyrdy, dep jazady Egemen.kz.
Forým ulttyq seriktester men bıznes ókilderiniń qoldaýymen BUU-nyń Qazaqstandaǵy ókildigi jáne BUU Jahandyq shartynyń Ortalyq Azııa jelisi uıymdastyrǵan joǵary deńgeıli aımaqtyq alańǵa aınaldy. Is-sharanyń basty maqsaty óńir elderiniń ekonomıkasyn jańǵyrtýdy, jasyl tehnologııalardy engizýdi jáne qoǵamnyń áleýmettik ál-aýqatyn arttyrýdy júıeli túrde úılestirý boldy.
Jıynda Ortalyq Azııadaǵy ınnovasııalar men jasyl transformasııany jedeldetýdegi jeke sektordyń mańyzy atap ótildi. Sonymen birge Qazaqstan, Qyrǵyzstan, О́zbekstan, Tájikstan jáne Túrikmenstan kompanııalaryn baılanystyratyn jańa aımaqtyq hab retinde BUU Jahandyq shartynyń Ortalyq Azııa jelisi tanystyryldy. Bul alań óńirdiń jaýapty bıznesin bir arnaǵa toǵystyryp, halyqaralyq standarttarǵa saı yntymaqtastyq ornatýǵa jol ashady.
Elimizde ekologııany qorǵaý, áleýmettik jaýapkershilik jáne korporatıvtik basqarý sapasyn arttyrýǵa baǵyttalǵan ESG qaǵıdattaryn qoldanatyn kompanııalardyń sany 150-den asty. Bul bıznes qaýymdastyqtyń Ornyqty damý maqsattaryna qosqan naqty úlesin kórsetedi.
Forýmda Eńbek jáne halyqty áleýmettik qorǵaý vıse-mınıstri Vıktorııa Shegaı, BUU Qazaqstandaǵy Turaqty ókili Radnaaragcha Sarango jáne basqa da resmı tulǵalar sóz sóıledi. Vıktorııa Shegaı Halyqaralyq eńbek uıymynyń 26 negizgi konvensııasynyń ratıfıkasııalanǵanyn, BUU Múgedekterdiń quqyqtary týraly Fakýltatıvtik hattama qabyldanǵanyn jáne eńbek naryǵyn damytýǵa arnalǵan jańa tujyrymdamalardyń iske asyrylyp jatqanyn aıtty. Onyń aıtýynsha, bul sharalar ınklıýzıvti saıasatty kúsheıtip, Ornyqty damý maqsattaryna jetýdi jedeldetedi.
Ulttyq ekonomıka mınıstrliginiń ókili Nurgúl Jannazarova memleket pen jeke sektordyń kúsh biriktirgen jaǵdaıda ulttyq jáne jahandyq deńgeıde aıqyn nátıjege qol jetkizýge bolatynyn atap ótti. Ortaq maqsatqa umtylǵan qadamdar eldiń damýyn turaqty etetini aıtyldy.
Qazaqstandaǵy BUU Turaqty úılestirýshisi Radnaaragcha Sarango Qazaqstannyń sońǵy jyldary Ornyqty damý maqsattary boıynsha aıtarlyqtaı ilgerilegenin jáne bul baǵytta Úkimet pen BUU arasyndaǵy áriptestik óz jemisin berip jatqanyn málimdedi.
Forým qorytyndysy Ortalyq Azııany jańa Jibek joly úlgisimen damytýdyń berik negizi qalanǵanyn kórsetti. Jasyl tehnologııalar, ınklıýzıvti saıasat jáne jaýapty bıznes óńirdiń jańa damý baǵytyna aınalmaq.