Memlekettik keńesshi Erlan Qarın elimizde tuńǵysh ret qabyldanǵan «Qazaqstan Respýblıkasy ishki saıasatynyń negizgi qaǵıdattary, qundylyqtary men baǵyttaryn bekitý týraly» Jarlyqty tarıhı mańyzy bar qadam retinde atap ótti. Onyń aıtýynsha, Qazaqstanda buǵan deıin ishki saıasattyń ıdeologııalyq baǵytyn, maqsat-mindetin jáne uıymdastyrýshylyq aıasyn tolyq qamtıtyn birtutas qujat bolǵan emes, dep habarlaıdy Egemen.kz.
Erlan Qarınniń málimdeýinshe, tujyrymdamany ázirleý ıdeıasy biraz ýaqyt boıy talqylanyp kelgen. Býrabaıda ótken Ulttyq quryltaıda sarapshylar men qoǵam qaıratkerleri osy máselege nazar aýdaryp, Edil Jańbyrshın, Aıdos Sarym, Nıkıta Shatalov, Gúlmıra Ileýova, Andreı Chebotarev, Danııar Áshimbaev, Marat Shıbutov jáne basqalar qujatty ázirleý ýaqyt talaby ekenin atap ótken.
Memleket basshysy bul usynysty qoldap, máseleni tereń zerdeleýdi tapsyrǵan bolatyn. Nátıjesinde belgili sarapshylar, Ulttyq quryltaı músheleri men ǵylymı qaýym ókilderi jarty jyldan astam ýaqyt birigip eńbek etti. Ásirese Erkin Ábil, Erlan Saırov, Aıgúl Sádýaqasova, Berik Ábdiǵalıuly, Talǵat Qalıev, Qarlyǵash Jamanqulova, Raýan Kenjehanuly, Nurbek Matjanı, Aleksandr Danılov, Ǵazız Ábishev bastaǵan azamattar úlken eńbek sińirgen.
«Birlesken jumystyń nátıjesinde memlekettik qaǵıdattardyń, jalpyulttyq qundylyqtardyń, ishki saıasattyń basty baǵyttary júıelendi. Tujyrymdama júrgizilip otyrǵan qazirgi saıasatty birtutas dúnıege aınaldyrdy. Áleýmettik jelilerde, buqaralyq aqparat quraldarynda jarııalanǵan materıaldar onyń qoǵamda oń qabyldanǵanyn kórsetip otyr. Keıingi jyldary elimizde aýqymdy saıası reformalar júzege asyryldy. Sonyń nátıjesinde memlekettik apparatqa jańa adamdar kele bastady. Máselen, aýyldyq okrýgterdiń ákimderi saılanýda. «Prezıdenttik jastar kadr rezervi» jobasy iske qosyldy. Júıede býyn almasý úderisi úzdiksiz júrip jatyr. Sondyqtan ishki saıasat tujyrymdamasy memlekettik qyzmet júıesine ózge salalardan kelgen basshylardyń jańa býynyna kómekshi qural retinde paıdaly bolmaq», dedi Memlekettik keńesshi.
Qujatta elimizdiń jalpyulttyq nyshandary da bekitilgen.
«Máselen, shańyraq – ulttyq birliktiń, dombyra – ulttyq mýzykalyq aspaptyń, Abaıdyń «Qara sózderi» ulttyq kitaptyń nyshany bolyp aıqyndaldy. Bul nyshandar elimizge tán erekshelikterdi tanýǵa, jalpyulttyq biregeıligimizdi nyǵaıtýǵa jáne tarıhı-mádenı muramyzdy saqtaýǵa yqpal etedi», dedi Erlan Qarın.
Synshylardyń keıbiri «bul qujatta jańa ıdeologııa nege joq?» dep synǵa alǵanymen, Erlan Qarın mundaı maqsat áý bastan kózdelmegenin aıtty.
«Onyń ústine bizdegi saıası plıýralızm, pikir alýandyǵy jaǵdaıynda bul múmkin emes. Qujattyń máni – azamattarymyz ustanatyn jalpyǵa ortaq qarapaıym normalar men qundylyqtardy bekitý. Iаǵnı qoǵamdyq qurylym kúrdelengen saıyn ártúrli kózqarastaǵy, ártúrli ustanymdaǵy adamdardy biriktiretin ortaq qundylyqtardy aıqyndaý», dedi ol.
Eń mańyzdy tustardyń biri – tujyrymdamamen birge qomaqty bıýdjet nemese aýqymdy is-sharalar jospary bekitilmegen. Qarınniń sózinshe, qazirgi ustanym – artyq shyǵynsyz, formalızmge jol bermeı, ishki saıasattyń ınstıtýsıonaldyq negizin kúsheıtý. Osy maqsatta qazirden bastap qoǵamdyq nagradalar júıesi, mekteptegi tárbıe baǵyty, eńbekqorlyq pen jasampazdyqqa negizdelgen qundylyqtardy birizdendirý jumystary bastalyp ketken.
«Ishki saıasat – memlekettiń damýy men turaqtylyǵynyń basty tiregi. Táýelsizdik alǵaly elimizde ár kezeńde ishki saıasattyń basymdyqtaryna oraı túrli qujattar, baǵdarlamalar qabyldandy. Biraq bul qujattarda salanyń qaǵıdattary men qundylyqtary, maqsattary men baǵyttary birtutas júıe retinde kórsetilmegen edi. Kerisinshe keıde bir-birine qaıshy keletin normalar kezdesetin. Endi, mine, memlekettik deńgeıde alǵash ret ishki saıasat uǵymy, onyń maqsattary men mindetteri, baǵyttary júıeli túrde naqty aıqyndalyp, bekitilip otyr», dep túıindeıdi Erlan Qarın.