ASTANA. 22 naýryz. Belarýs astanasy – Mınskiniń ortalyǵyna taıaý ýaqytta sıyrdyń eskertkishi qoıylmaq. Búginde osyǵan qatysty jarııalanǵan baıqaýǵa qujattardy qabyldaý aıaqtaldy. Bul týraly belta.by habarlady.
Baıqaýdy uıymdastyrýshy mekeme – Mınsk qalalyq mádenıet basqarmasy. Atalǵan mekeme taratqan málimetke súıensek, sıyrdyń músinin jasaýǵa 20 adam nıet bildirip, óz nusqalaryn jibergen. Qalalyq atqarýshy komıtettiń sheneýnikterinen jasaqtalǵan qazylar alqasy jeńimpazdy 25 naýryzda anyqtaıdy. Baıqaý talaptary boıynsha sıyrdyń músini yqsham jáne qalanyń sáýlet úlgisimen úılesimdi bolýy kerek. Nıet bildirgenderdiń arasynda belgili músinshiler men sáýletshiler bar. Olardyń kópshiligi eldegi shyǵarmashylyq odaqtyń músheleri. Sondaı-aq, Belarýs О́ner akademııasynyń stýdentteri de óz baqtaryn synap kórmek.
Qoladan quıylatyn sıyr músini Mınskidegi «Komarov bazary» kommýnaldyq saýda mekemesiniń aldyndaǵy alańǵa qoıylady dep josparlanýda. Bul bazar Belarýs astanasynyń ortalyǵynda ornalasqan.
Qala basshylyǵynyń aıtýynsha, sıyr malynyń belorýs halqy úshin mańyzy zor. «Qıyn-qystaý kezeńderde súti men eti eldi aman saqtap qaldy. Odan bólek, elimizdiń búgingi damýynda da sıyr eti men sútiniń róli erekshe. Biz búginde osy ónimderdi eksporttaý arqyly memlekettiń qazynasyna mol qarjy quıyp otyrmyz. Sondyqtan sıyrǵa eskertkish qoıý óte oryndy», deıdi bılik ókilderiniń biri.
Qazirgi tańda álemniń birqatar elinde sıyr malyna eskertkish qoıylǵany belgili. Máselen, sút ónimderi men irimshik óndirýde aldyńǵy qatardaǵy el sanalatyn Nıderlandy da bul janýarǵa erekshe qurmet bildirgen. Al Úndistanda sıyrǵa qoıylǵan eskertkish júzdep sanalady. Onyń sebebi aıtpasa da túsinikti.
Elaman Qońyr.
Derek: belta.by.
Sýret: by24.org.