Nege ekenin qaıdam, ákim ataýly týraly biraýyz jyly sóz jazbas buryn, oılanyp-tolǵanamyz. Jaqsylyǵyn kórip tursaq ta, tartynshaqtaımyz. Deı turǵanmen, Katonqaraǵaı aýyldyq okrýginiń ákimin turǵyndary jaqtap, maqtap jatqanyn jıi estidik. Qashan kórseń, halyqtyń arasynda deıdi. Tipti tehnıkany ózi tizgindep, qara jumysqa da kirisip ketedi eken.
Jas bolǵanymen, aýdan ortalyǵyna bas bolyp júrgen Danııar Muratulyn kópshilik qoldap otyr. Katonqaraǵaı aýdany keshe ǵana jeke aýdan bolyp, bólinip shyqqan soń birqatar jumys qolǵa alynǵan. Onyń oryndalǵany, oryndalmaǵany bar. Al okrýg basshysy qolynan kelgen jumysty barynsha atqaryp júr.
Qarap otyrsaq, aýyldyń halqyna eń keregi – jol, ınternet, aýyzsý. Iá, aýyzsýdan buryn ınternetke táýeldi. Kúndelikti sýdy tasyp ishken el oǵan ábden úırenisken. Ortalyqtandyrylǵan sý júıesi endi-endi kezeńimen qosylyp jatyr. Prezıden Qasym-Jomart Toqaev tapsyrǵandaı, jyl sońyna deıin barlyq aýyl 100 paıyz aýyzsýǵa qosylýǵa tıis. Bul jumys Katonqaraǵaı aýyldyq okrýginde de istelip jatyr. Jaryqtandyrý jumystary da aýdan bolǵaly qolǵa alyndy. Oǵan deıin shekara shebinde jatqan jurt jetimniń kúıin keshken. Ony nesine jasyramyz? Sondyqtan qazirgi basshylar úshin atqaratyn sharýa – qyrýar.
Okrýg ákiminiń esep-qısabyna kóz salsaq, aýdan ortalyǵyndaǵy Abaı, O.Bókeı kóshelerindegi sharyq shamdaryn jańalap, aýyldyń kireberisine jańa shamdar ornatypty. Sonaý taý qýysynda jatqan Moıyldy aýylyna shaǵyn ınternet jelisin júrgizipti. Al Shyńǵystaı aýylynyń kóshelerine jaryq qosylǵan, úıdi-úıge aýyzsý tartylǵan. Osyndaı ıgi isterdiń basynda júrgen okrýg basshysy atqarǵan jumystaryn jarııalaı bermegen.
Sýretti túsirgen – avtor
Danııar Qasenov 1993 jyly Úlken Naryn aýylynda dúnıege kelgen eken. Keıin «Metallýrgııa» mamandyǵyn alyp, eńbekke aralasqan. Túrli qyzmetterden satylap ósip, okrýg ákiminiń ornyna jaıǵasqan. Qyzmetke kiriskenimen, aıtqanymyzdaı el ishinde kóp júredi. Aıtyp ótkenimizdeı, traktorǵa otyra salyp, kóshe-kósheniń qaryn kúrep shyǵý – jas ákim úshin op-ońaı sharýa.
– Halyq senim artyp otyrǵan soń moıynǵa mindettelgen jumystardy isteımiz. Bári el ıgiligi úshin. Kórip otyrsyzdar, Katonqaraǵaı aýylynda aýyzsý júıesi tartyldy, jumystar aıaqtaldy. Kóktemde úıdi-úıge sý beremiz. Al tehnıka tizgindeýime tańǵalatyndaı túk joq. Kishkentaıdan kólikke jaqyn bolyp óstim, qyzyqtym. Qara jumystan qashýǵa bolmaıdy, – deıdi okrýg ákimi.
Iá, bir emes, bútindeı úsh aýyl senim artyp otyrǵan soń eldiń úmitin aqtaý ár basshynyń paryzy, halyq aldyndaǵy qaryzy. Elim dep turǵan ákimder kóp bolsa, jerim dep turǵan el eselenedi.
Shyǵys Qazaqstan oblysy,
Katonqaraǵaı aýdany