Zań ústemdigi zorlyqqa jol bermeıdi

Bul is-shara Birikken Ulttar Uıymynyń «Zorlyq-zombylyqsyz 16 kún» halyqaralyq naýqanynyń bastalýymen oraılastyrylyp otyr. Aıta ketsek, atalǵan naýqan 25 qarashadan 10 jeltoqsanǵa deıin jalǵaspaq. Turmystyq zombylyqty túp-tamyrymen joıýǵa baǵyttalǵan bastamaǵa Qazaq eli de úlesin qosyp keledi.

Baıandama tanystyrylymynda sóz sóılegen Mádenıet jáne aqparat vıse-mınıstri Evgenıı Kochetov BUU bastamasymen júzege asyp jatqan bıylǵy naýqannyń taqyryby áıelder men qyzdarǵa qatysty sıfrlyq zorlyq-zomby­lyqqa qarsy kúreste kúsh birik­tirýge arnalǵanyn aıtty. Osy oraı­da res­pýblıkamyzda 500-ge tarta is-shara josparlanǵanyn, onyń ishin­de aqparattyq-aǵartý­shylyq jumystar, semınarlar, ma­man keńesteri, sondaı-aq zorlyq-zom­by­lyqtyń aldyn alý men jábir­lený­shilerge qoldaý kórsetýge baǵyt­talǵan qoǵamdyq ári jastar bas­tamalary bar ekenin tilge tıek etti.

«Basty maqsatymyz – árbir balanyń, ár adamnyń otbasynda jáne qoǵamda ózin qaýipsiz sezinýi. Zorlyq-zombylyqtyń aldyn alý tek zańnamamen nemese qyzmettermen shektelmeıdi, ol tulǵalar arasynda ózara qurmet pen qoldaý mádenıetin qalyptas­tyrýdy talap etedi», dedi ol.

E.Kochetovtiń aıtýynsha, ulttyq baıandama Mádenıet jáne aqparat mınıstrliginiń tapsyrysymen jylyna eki ret ázirlenedi. Onyń negizgi maqsaty – elimizdegi otbasylyq-turmystyq zorlyq-zombylyq máselesin tereń zerttep, ony sheshýge arnalǵan naqty tájirıbelik usynystar ázirleý.

«Ulttyq baıandama óńirlerdegi jaǵdaıdy obektıvti baǵalaýǵa, saıasattyń tıimdiligin anyqtaýǵa jáne qandaı baǵyttardy kúsheıtý qajettigin aıqyndaýǵa múmkindik beredi. Bul – qabyldanatyn shara­l­ardyń qoǵamnyń shynaıy qajet­tilikterine saı bolýyn qamtamasyz etetin negizgi analı­tıkalyq qural. Baıandamadaǵy derekter sarapshylar qaýymdastyǵy men memleket­tik organdar tarapynan keńinen paıdalanylady, al baıandama usy­nym­dary strategııalyq jáne normatıvtik qujattardy ázirleýde eskeriledi», dedi vıse-mınıstr.

E.Kochetov byltyr elimizde zań­namaǵa ózgerister engizilip, tur­mystyq zombylyqqa qatysty keıbir ákimshilik quqyq buzýshylyqtar qylmystyq quqyq buzýshylyq sanatyna aýystyrylǵanyn, sodan beri oń úrdister baıqalyp otyrǵanyn jetkizdi. Otbasyn qoldaý ortalyqtarynyń sany úsh esege kóbeıip, 33-ten 131-ge deıin artqan. Jyl basynan beri bul orta­lyqtarǵa 44,5 myńnan asa ótinim kelip túsken. Onyń ishinen 20 myń otbasy quqyqtyq, psıhologııalyq, áleýmettik keńes alsa, 15,4 myń otbasy keshendi qadaǵalaýda júr.

«Ulttyq baıandama málimet­terine súıensek, qoǵamda áıelderdi zor­lyq-zombylyqtan qorǵaý baǵy­tynda oń ózgeris bar. Mundaı kóz­qarastaǵy adamdar sany keıingi eki jylda 8 paıyzǵa artyp otyr», dedi ol.

Aıta ketsek, ulttyq baıandama tórt analıtıkalyq blokten turady: qazirgi jaǵdaıdy baǵalaý, zorlyq-zombylyqtyń jasyryn túrlerin taldaý, qoldanystaǵy sharalardyń jáne profılaktıkalyq tájirıbe­lerdiń tıimdiligine sholý. Zert­teý áleý­mettanýlyq saýalnama derek­terine, resmı statıstıkalar­ǵa jáne sa­rapt­amalyq baǵalaýǵa negizdelgen.

QQDI basshysy Juldyzaı Ysqaqova baıandamanyń otbasy­lyq-turmystyq zorlyq-zombylyq sala­syndaǵy ahýaldy taldaýǵa arnal­­ǵan mańyzdy qural ekenin jáne onyń zorlyq-zombylyqtan qorǵaý júıe­sin jetildirýge arnalǵan sheshim­derdi aıqyndaýǵa negiz bolaty­nyn atap ótti. Sondaı-aq azamat­tar­dyń, ásirese áıelder men bala­lar­­dyń qaýipsizdigin qamta­masyz etý mem­leket saıasaty­nyń basym ba­ǵy­t­tary­nyń biri ekenin de tilge tıek etti.

Jıyn barysynda ózge de qatysýshylar sóz alyp, otbasylyq-turmystyq zorlyq-zombylyqtyń aldyn alýǵa baǵyttalǵan memleket saıasatyn odan ári jetildirý jónindegi usynystaryn ortaǵa saldy.