Memleket basshysynyń tapsyrmalaryn júzege asyrý sheńberinde Qostanaı oblysyndaǵy jylý jelilerin rekonstrýksııalaýdy aıaqtaýǵa Úkimet rezervinen shamamen 2,2 mlrd teńge bólindi. Tıisti Qaýlyǵa Premer-mınıstr Oljas Bektenov qol qoıdy, dep habarlaıdy Egemen.kz Úkimettiń baspasóz qyzmetine silteme jasap.
Qarajat Qostanaı, Jitiqara, Arqalyq qalalaryn jylýmen jabdyqtaý jáne Rýdnyıdy sýmen jabdyqtaý nysandaryn jóndeýge baǵyttaldy.
Qostanaı qalasynyń JEO bas bý qubyryn rekonstrýksııalaýǵa 188 mln teńge bólindi. Bul nysan 1955 jyly paıdalanýǵa berilgen.
Bý qubyryn ishinara jóndeý sońǵy ret 2012 jyly júrgizilgen. Jańǵyrtý qysqy kezeńde JEO jumysynyń senimdiligin arttyrýǵa múmkindik beredi.
Jitiqara qalasynda 11 shaǵyn aýdanda jylý jelilerin jóndeýge 389 mln teńge bólindi. Bul jylý jelileri 183 kóppáterli úı, 2,5 myń az qabatty úımen qatar, qala qurylysynyń edáýir massıvterin qamtıdy. Jylý energııasyn tutynýshylardyń jalpy sany 15,5 myń abonentti quraıdy.
Jalpy, qalanyń jylý jelileriniń uzyndyǵy 78 shaqyrym, onyń ishinde magıstraldyq jelileri – 7,53 shaqyrym.
Sondaı-aq jumystar Arqalyq qalasynda da júrgizilip jatyr, onda jylý jelilerin rekonstrýksııalaý boıynsha jobanyń úshinshi kezegin júzege asyrýǵa shamamen 645 mln teńge baǵyttaldy. 2025 jylǵa esepteýlerge sáıkes jalpy uzyndyǵy 10 shaqyrym bolatyn 1,6 shaqyrym jelini jańartý josparlanyp jatyr. Bul jelige jalpy bilim beretin mekteppen qatar 300 abonent qosylǵan.
Rýdnyı qalasynyń sýmen jabdyqtaý júıesin rekonstrýksııalaý jobasy 500 mln teńgege qarjylandyryldy. Atap aıtqanda, qarajat 1978 jyly paıdalanýǵa berilgen qalanyń №2 súzgi stansasyn jańǵyrtýǵa jumsalady. Joba Rýdnyı qalasyn, Qashar jáne Gornıask kentterin, sondaı-aq ónerkásiptik nysandardy – barlyǵy 122 myńnan astam adamdy úzdiksiz jáne sapaly sýmen jabdyqtaýdy, sondaı-aq jylytý maýsymynyń apatsyz ótýin qamtamasyz etedi.
Úkimet qabyldaǵan jańǵyrtý sharalary óńirdegi ınjenerlik ınfraqurylymdy edáýir nyǵaıtýǵa, jylý jáne sýmen jabdyqtaý nysandarynyń senimdiligi men tıimdiligin arttyrýǵa, shyǵyndardy azaıtýǵa, turǵyndar men áleýmettik mańyzy bar nysandardy jylýmen jáne sýmen qamtamasyz etýge múmkindik beredi.