Elimizde medısınalyq týrızmniń damýyna yqpal etetin «GlobalMedKz» halyqaralyq kórmesi ótip jatyr. Oǵan otandyq jáne sheteldegi birneshe medısınalyq uıymdar, salada tájirıbesi bar jetekshi kompanııalar qatysty. Kórmede buryn-sońdy jıi qoldanylmaǵan ınnovasııalyq, IT sheshimder usynyldy, dep jazady Egemen.kz.
Qazaqstan medısınalyq týrızmniń damý qarqyny boıynsha Orta Azııada kóshbasshy sanalady. Buny biz emes, Qazaqstan medısınalyq týrızm qaýymdastyǵynyń prezıdenti Krıstına Krıves aıtty. Naqty sanǵa toqtalsaq, búginge deıin 80 myńǵa jýyq shetel azamaty bizdiń elde emdelgen. Onyń ishinde Eýropadan keletinder keıingi 5 jyldyń shamasynda kóbeıgen. Demek, eldegi medısınalyq kómektiń baǵasy men sapasy sheteldikterdiń de kóńilinen shyǵyp jatyr degen sóz. Kórme aıasynda ótken konferensııada medısınalyq týrızmdi damytýǵa múddeli taraptar bas qosty.
Kórmeniń ashylýynda Densaýlyq saqtaý vıse-mınıstri Álııa Rústemova medısınalyq týrızmniń el medısınasyndaǵy orny týraly aıtty.
«Memleket basshysy Joldaýda týrızmdi keshendi damytýǵa basymdyq berý keregin alǵa tartty. Bul rette medısınalyq týrızmdi de damytýǵa jańa kózqaras qajet ekenin aıtqym keledi. Elimizde qazir halyqaralyq JCI akkredıtasııasy bar 8 jetekshi klınıka jumys isteıdi. Olar sheteldik emdelýshilerge medısınalyq kómek usynady. Onyń ishinde kardıohırýrgııa, transplantologııa, onkologııa, neırohırýrgııa jáne basqalary bar. Qarashada Ulttyq ǵylymı onkologııa ortalyǵynda protondy terapııa bólimi ashyldy. Mundaı bólim bizde ǵana emes, Ortalyq Azııada jalǵyz. Medısınalyq kómek sapasyn arttyrý maqsatynda naýqastarǵa jaıly jaǵdaı jasaýǵa myqtap kóńil bólinip jatyr. Sıfrlyq sheshimderge, ınnovsııalyq tehnologııalarǵa basymdyq berilip keledi. Munyń barlyǵy medısınalyq týrızmniń áleýetin arttyrýǵa septesedi».
Is-sharanyń ótýine uıytqy bolǵan Qazaqstan medısınalyq týrızm qaýymdastyǵynyń prezıdenti Krıstına Krıves bastaǵan ujym qonaqtarǵa tabys tilep, týrızmniń osy baǵytyn birge damytýǵa shaqyrdy.
«Kórmege 16 elden medısınalyq týrızm baǵytynda ózindik orny bar ujymdar keldi. Olardyń tájirıbesi, tyń izdenisteri bizdiń medısınaǵa da qajet. Konferensııada medısınadaǵy ınnovasııalyq sheshimder, medısınadaǵy IT baǵyttar da qamtylady. Baıqaǵanymyz, qazir bizge sheteldik týrıster kardıohırýrgııa, neırohırýrgııa jáne reprodýktıvti medısına úshin kóbirek keledi. Olardy qyzyqtyratyny bizdegi baǵa men sapa. Kórmege 40-tan astam sarapshy kelip otyr. Onkologııa, neırohırýrgııa, reprodýktıvti medısına, stomotologııa taǵysyn-taǵy salalar boıynsha sarapshylar bar. Olar kórme aıasynda azamattarǵa tegin keńes beredi. Sol sekildi dárigerler úshin sheberlik saǵaty, dóńgelek ústel ótedi», deıdi Krıstına Krıves.
Týrızm jáne sport mınıstrligi Týrızm ındýstrııasy komıteti tóraǵasynyń orynbasary Aıdyn Qapashevtyń aıtýynsha, búginde álemdik medısınalyq týrızm naryǵynyń kólemi shamamen 85 mlrd dollardy quraıdy. Al 2029 jylǵa qaraı bul kórsetkish 230 mlrd dollardan asýy ábden múmkin. Saladaǵy serpilis elimizde 2022 jyldan beri eselenip óskeni baıqalady.
«Mysaly, Astanada sheteldik emdelýshiler sany 2022 jyly 561 bolsa, 2024 jyly 4 500-ge jetken. Bul el medısınasynyń sapasyna senimdilikti kórsetedi. Sala mamandary osy baǵytta kúsh biriktirýge daıyn ekenin ańǵartyp otyr. Týrızm jáne sport mınıstrligi men Densaýlyq saqtaý mınıstrligi ekijaqty yntymaqtastyq týraly kelisimshartqa qol qoıdy. Bul qujat medısınalyq týrızmdi damytýda kúsh biriktirýge jáne eldiń halyqaralyq tartymdylyǵyn arttyrýǵa baǵyttalǵan qadam», deıdi Aıdyn Qapashev.
Qoryta kele, kórme aıasynda jetekshi sarapshylar, medısınalyq uıymdardyń ókilderi, zertteý ınstıtýttarynan bólek, álemniń túkpir-túkpirinen týrıstik kompanııalar bas qosqanyn aıta ketkenimiz durys bolar. Osyǵan qosa, Astanaǵa Izraıl, Germanııa, Kıpr men Túrkııadan bilikti dárigerler arnaıy keldi. Qonaqtar eki kún boıy ınnovasııalyq tehnologııalaryn tanystyryp, medısınalyq týrızmdi damytýǵa qatysty saýaldardy saralaıdy.