Qazaqstan halqy Assambleıasy Keńesiniń merziminen buryn prezıdenttik saılaý ótkizý týraly usynysyn qoldaýshylar qatary kúnnen-kúnge artyp keledi. Keshe osy máselege oraı Ulttyq akademııalyq kitaphanada bas qosqan «Bas redaktorlar klýby» qoǵamdyq birlestiginiń músheleri óz úndeýlerin qabyldady.
Usynylǵan mátin jobasyn Qoǵamdyq birlestik tóraıymy Bıbigúl Jeksenbaı jarııa etti. Atalǵan úndeý «Bas redaktorlar klýby» qoǵamdyq birlestigi Qazaqstan medıa-qoǵamdastyǵy ókilderiniń atynan Qazaqstan Respýblıkasy Prezıdentin merziminen buryn saılaýdy qoldaıtyndaryn bildiredi, dep bastalǵan. Bastama el múddesinen jáne halyqaralyq ekonomıkalyq jaǵdaıdyń turaqsyzdyǵynan týyndap otyrǵandyǵy erekshe atalyp, prezıdenttik saılaýdy merziminen buryn ótkizý qoǵamdy aýqymdy maqsattarǵa jetý jolynda yntymaqqa shaqyra alatynyna senim bildirilipti.
Úndeý «Aldaǵy ýaqytta memlekettik apparat pen barsha qazaqstandyqtardyń kúsh-jigeri ekonomıkadaǵy daǵdarys trendiniń saldaryn azaıtýǵa baǵyttalýy tıis. Búgingi kúnde Qazaqstan áleýmettik-ekonomıkalyq damýdyń tabysty kórsetkishin, sondaı-aq, elimizdiń birligi men gúldenýiniń beıbitshilik qorǵany ekenin kórsetip otyr», delingen úndeýde. Osyǵan oraı, Qazaqstan halqy Assambleıasy merziminen buryn prezıdenttik saılaý ótkizýdi usynǵany quptarlyq jáıt. Elimizde medıa sala men azamattyq qoǵam ınstıtýttary qarqyndy túrde damýda, olar ózderiniń jobalaryn qoǵamnyń ártúrli áleýmettik salasynda tıimdi paıdalanýda. Damyǵan 30 eldiń qataryna kirý ıdeıasyn quptaý maqsatynda barlyq qazaqstandyqtardy, barlyq buqaralyq aqparat quraldaryn jáne úkimettik emes uıymdardy Qazaqstan halqy Assambleıasy Keńesiniń usynysyn qoldaýǵa shaqyramyz, dep aıaqtalǵan.
Úndeýdi qoldaıtyndyqtaryn bildirgen Qoǵamdyq birlestik músheleri óz oılaryn ortaǵa saldy. Aldymen sóz alǵan «Egemen Qazaqstan» respýblıkalyq gazeti» AQ prezıdenti Saýytbek Abdrahmanov qazir búkil halyq bir ıdeıanyń, sonyń ishinde bir usynystyń tóńiregine jumylyp otyr dep aıtýdyń eshqandaı artyqtyǵy joq ekendigin tilge tıek ete ketti. «Barlyq býyn men top ókilderi Qazaqstan halqy Assambleıasy Keńesiniń usynysyn kókeıge ábden qonymdy dep esepteıdi. Onyń ústine, bul usynysty saıası kúshter qoldaýda. Barlyq buqaralyq aqparat quraldary betinde tolyq qoldaý taýyp keledi. Qaı jaǵynan qaraǵanda da bul óte oryndy», dedi S.Abdrahmanov.
Ol, sonymen qatar, saılaýdy merziminen buryn ótkizýdi eki jaǵdaıǵa negizdedi. «Birinshiden, eki saılaýdy bir jylda ótkizý Konstıtýsııaǵa qaıshy ekendigin aıtýdyń ózi jetkilikti. Ekinshiden, qazirgi álemde qalyptasyp otyrǵan jaǵdaı biz ózimizdiń memleketimiz úshin taǵdyrsheshti máseleni osy kezde ózimiz sheship, jasampazdyq jolymyzdy jalǵastyrýymyzǵa múmkindik alý kerek ekenimizdi kórsetedi. Sondyqtan bul usynysty biz tolyq qoldaımyz», dedi. Osy turǵydan kelgende, «Egemen Qazaqstan» gazetinde kún saıyn mol materıaldar basylýda. Barlyq basylymdar men arnalar da osy máseleni kóterip keledi. Olaı bolsa, «Bas redaktorlar klýby» qoǵamdyq birlestiginiń usynysy qaı jaǵynan bolsa da qoldaýǵa laıyq.
Budan keıin sóz alǵan «Kazahstanskaıa pravda» gazetiniń bas redaktory Tatıana Kostına bul jýrnalıster qaýymy úshin mańyzdy oqıǵa bolǵandyǵyn, sondyqtan da gazet ujymy Qazaqstan halqy Assambleıasynyń usynysyn qoldaǵandyqtaryn alǵa tartty. «Bul usynys der kezinde qabyldanǵan durys sheshim boldy. О́zim de Assambleıa Keńesiniń otyrysyna qatysyp, Keńes músheleriniń dáıekti sózderin estigen edim. Sondyqtan da salmaqty sheshim bolǵanyna esh kúmánim joq. Gazetimizge tolassyz kelip jatqan qoldaý hattardyń kóptigi de osy sheshimimizge oń yqpal etkenin aıta ketý kerek», dedi bas redaktor.
Sondaı-aq, otyrysta sóz alǵan «Ýkrainski novını» respýblıkalyq gazetiniń bas redaktory Taras Chernega elordanyń álem tanyǵan qalaǵa aınalyp, al elimizdiń halyqaralyq dárejede moıyndalǵany Prezıdent N.Á.Nazarbaevtyń arqasynda múmkin bolǵandyǵyn erekshe atady. Qazaqstan halqy Assambleıasynyń usynysy qoǵam tarapynan qyzý qoldaýǵa ıe ekenin alǵa tartqan T.Chernega etnostyq basylymnyń biri retinde ózi basqaryp otyrǵan gazet ujymy da atalǵan usynysty qoldaıtyndyǵyn jetkizdi.
Asqar TURAPBAIULY,
«Egemen Qazaqstan».
ASTANA.