Búgin Qaraǵandy oblystyq «Saryarqa» hokkeı klýbynyń komanda bazasynda ótken jıynda ujymǵa jańa dırektor – Berik Bolatuly Týıamashev resmı túrde tanystyryldy. Is-sharaǵa Qaraǵandy oblysynyń dene shynyqtyrý jáne sport basqarmasynyń basshysy Serik Sápıev jáne Qaraǵandy oblysynyń hokkeı federasııasynyń prezıdenti Aıbek Jumabekov qatysty, dep habarlaıdy Egemen.kz klýbtyń baspasóz qyzmetine silteme jasap.
Jıyn barysynda basshylyq aldaǵy maýsymdaǵy negizgi mindetterdi atap ótip, komandanyń jankúıer kútken nátıjelerge qol jetkizýi úshin bar jaǵdaı jasalatynyn atap ótti. Berik Bolatuly – sport salasynda tájirıbesi mol, hokkeı menedjmentin jaqsy meńgergen maman.
Bilimi:* 2009–2011 jj. Qaztutynýodaǵy Qaraǵandy memlekettik ýnıversıteti («Quqyqtaný»);* 2011–2013 jj. Sh. Ýálıhanov atyndaǵy Kókshetaý memlekettik ýnıversıteti («Dene shynyqtyrý jáne sport»);* 2013 j. «Bolashaq» baǵdarlamasymen Reseı Halyqaralyq Olımpıadalyq ýnıversıteti («Sporttyq menedjment»);* 2011 j. Máskeýde ótken TMD jastar kúnderinde QR BǴM atynan Qazaqstan delegasııasyn basqarǵan.
Eńbek tájirıbesi: * 2012–2013 jj. Astanadaǵy «Barys» sporttyq-jattyǵý kesheniniń dırektory;* 2014–2015 jj. quramynda «Astana» hokkeı klýby bar «Astana sport klýby» JShS basshysy.
Sońǵy jyldary Berik Týıamashev aımaqta buqaralyq sportty damytýǵa eleýli úles qosyp keledi. Endi ol tájirıbesin Qaraǵandynyń basty hokkeı komandasyn jańa bıikke shyǵarý jolynda jumsamaq. Sondaı-aq, jańa basshynyń osy maýsymdaǵy basty maqsaty – klýbtyń kópten kútken chempıondyq tıtýlyn qaıtarýǵa bar kúsh-jigerin salý ekendigin atap ótti.