Ulttyq ortalyq mýzeıde Mádenıet salasynyń úzdigi, sýretshi, músinshi, karıkatýrashy Qalı Qoralasbaevtyń shyǵarmashylyǵyna arnalǵan «Kıeli meken» atty kórme ashyldy, dep jazady Egemen.kz.
Kórmede sýretshiniń ómir jolyna, shyǵarmashylyq murasyna jáne týǵan jerge degen shynaıy qurmetine negizdelgen týyndylar kóńil baýraıdy.
Ulttyq mádenıetimizdi jańǵyrtyp, Qazaqstannyń beıneleý ónerin kópshilikke tanytý, rýhanı qundylyqtardy tereń nasıhattaý maqsatynda uıymdastyrylǵan kórmede týǵan jer tarıhy, ulttyq bolmys pen tabıǵat sulýlyǵy beınelenip, kórermenge el mádenıetiniń tereń tamyryn sezinýge múmkindik beredi.
Kórmeniń ashylý saltanatynda sýretshiniń alǵashqy ustazdary men áriptesteri sóz alyp, Qalı Qoralasbaevtyń shyǵarmashylyq jolynyń ereksheligi men el mádenıetine qosqan úlesin atap ótti.
Saltanatty rásimde Ulttyq ortalyq mýzeıiniń ǵalym-hatshysy Ersin Jaınaqov, Jambyl oblysynyń qurmetti azamaty Bolat Saýranbaev, «Ulaǵat otaýy» qoǵamdyq birlestiginiń tóraıymy Gúljahan Káribaıqyzy, «Rýhanııat Shý» qoǵamdyq qorynyń tóraǵasy Sáken Ataev, sýretshiniń alǵashqy ustazdarynyń biri Serikbaı Áljanov, sýretshi Muhtar Egezekov, О́ner akademııasynyń vıse-prezıdenti Marlan Nysanbaev, Shý aýdanynyń ákimi Baqytjan Jánibekov quttyqtaý sóz sóılep, sýretshiniń eńbegine joǵary baǵa berdi.
Kórme barysynda Qalı Qoralasbaevtyń shyǵarmashylyǵyna arnalǵan jańa formatta daıyndalǵan kitaptyń tusaýkeseri ótti. Jınaqqa avtordyń keńinen tanymal týyndylarymen qatar, buryn jarııalanbaǵan jumystary men muraǵattyq fotosýretteri engen.
Saltanatty is-shara Shý aýdanynan arnaıy kelgen Ábilahat Espaev atyndaǵy saz mektebiniń ansambli tartý etken mýzykalyq konsertke ulasty.