Ulytaý oblysynda birden eki mańyzdy nysan iske qosyldy. О́ńirde tuńǵysh ret áýe qutqarý jasaǵy jasaqtalyp, angar salynyp, qoldanysqa berildi. Angar úsh jarym aıdyń ishinde boı kóterdi. Qurylysty «Qazaqmys» korporasııasy qarjylandyrdy. Sonymen qatar oblys ortalyǵy Jezqazǵan qalasynda jańa órt sóndirý bólimshesi ashyldy.
Qos mańyzdy sharaǵa Tótenshe jaǵdaılar mınıstri Shyńǵys Árinov arnaıy qatysty.
– Tótenshe jaǵdaılar mınıstrliginde alǵash ret áýe tehnıkasyna arnalǵan arnaıy angar ashylyp otyr. Bul bizdiń avıasııanyń mańyzdy jetistigi. Memleket basshysynyń tikeleı qoldaýynyń arqasynda azamattyq qorǵaý júıesi, sonyń ishinde avıasııa jańa serpinmen damyp keledi. Bıyl alty tikushaq, úsh ushaq satyp alyndy. Jyl sońyna deıin taǵy bireýin alý josparda tur. Maqsatymyz – elimizdiń ár óńirinde 20 áýe qutqarý jasaǵyn qurý, sonyń arqasynda kez kelgen tótenshe jaǵdaıǵa der kezinde jetip, jedel áreket etý. Sonymen qatar avıasııa salasyna jas mamandardy daıarlaýdy jalǵastyratyn bolamyz, – dedi mınıstr.
Jańa ǵımarat zamanaýı talapqa saı salynǵan. Qyzmetkerlerdiń táýlik boıy jumys isteýine barlyq múmkindik bar.
Mınıstr Sh.Árinov Jezqazǵan qalasynda 50 jyldan keıin alǵash ret ashylǵan jańa órt sóndirý bólimi ǵımaratynda bolyp, «Bul da mınıstrliktiń júıeli jumysynyń nátıjesi» dep atap ótti quttyqtaý sózinde. Bólim qazirgi zamanǵy standarttarǵa saı jabdyqtalǵan. Qutqarýshylardyń qaýipsiz, sapaly qyzmet atqarýyna barlyq jaǵdaı jasalǵan.
Ulytaý oblysynyń ákimi Dastan Ryspekov atalǵan nysandardyń ashylýy óńir qaýipsizdigin qamtamasyz etýdegi asa mańyzdy qadam ekenin málim etti.
– Memleket basshysy óńirlerde tótenshe jaǵdaılarda halyqtyń qaýipsizdigin kúsheıtý isine erekshe mán berip keledi. Búgin ashylyp otyrǵan Áýe qutqarý jasaǵy men jańa órt sóndirý bólimshesi – osy baǵyttaǵy naqty qadam. Bul – turǵyndarymyzdyń qaýipsizdigi men ómirin qorǵaýǵa salynǵan mańyzdy ınvestısııa, – degen óńir basshysy jobaǵa qoldaý kórsetken Tótenshe jaǵdaılar mınıstrligi men «Qazaqmys» korporasııasyna alǵys bildirdi.
Saltanatty sharada tótenshe jaǵdaılar qyzmetkerlerine jańa tehnıka, birqatar sala qyzmetkerine qyzmettik páter kiltteri tabys etildi. Sonymen qatar sala qyzmetkerleri men óńirdiń belsendi azamattary arnaıy tósbelgi, alǵyshattarmen marapattaldy.
Bıyl Tótenshe jaǵdaılar mınıstrligi Ulytaý oblysyna zamanaýı jabdyqtalǵan tikushaq bergen bolatyn. Bul óńirde tutqıyldan bolyp qalatyn qıyn jaǵdaıda jedel qutqarýǵa barýǵa múmkindik jasap otyr. Aldaǵy ýaqytta da áýe qutqarý ınfraqurylymyn damytý jumysy jalǵasa beredi. Sonymen qatar jyl sońyna deıin oblystyń Sátbaev qalasy men Jáırem kentinde de jańa órt sóndirý bólimderiniń ashylýy josparlanyp otyr.
Ulytaý oblysy