Saty aýyldyq okrýgine qarasty Kúrmeti aýylynda 230-dan astam turǵyn bar. Olardyń arasynda egde jastaǵy adamdar kóptep sanalady.
Taýly aımaq turǵyndary talaı jyldardan beri medısınalyq mekemeniń qajettiligin sezinip kelgen edi. Bıyl jurtshylyq tilegi oryndalyp, jańadan salynǵan medısınalyq pýnkt paıdalanýǵa berildi.
Aýyl turǵyndarynyń qýanyshyn tasytqan is-sharaǵa Kegen aýdanynyń ákimi Nurbaqyt Teńizbaev, mekeme basshylary, qoǵamdyq uıym tóraǵalary, eńbek ardagerleri qatysyp, aqjarma lebizin bildirdi.
– Aýylymyzda buryn-sońdy mundaı nysan bolmaǵan. Bas aýyryp, baltyr syzdasa Satyǵa, odan ári 150 shaqyrym júrip, aýdandaǵy ortalyq aýrýhanaǵa baratynbyz. Shaǵyn da bolsa búgingi ashylǵan medısınalyq pýnkt turǵyndardyń der shaǵynda alǵashqy medısınalyq kómek alýyna paıdasyn tıgizetin bolady. Bul óńirge jyldan jylǵa týrıster de kóptep kelip jatyr. Sol sebepti medısınalyq kómekti qajet etetin adamdar sany artpasa kemimeıdi, – degen zeınet jasyndaǵy medbıke Raıgúl Qudaıbergenova aýyl turǵyndarynyń atynan sándi de sapaly ǵımarat turǵyzǵan merdiger kompanııa ókilderine alǵysyn bildirdi.
Aýdan ákimi Nurbaqyt Moldahmetuly da óz sózinde medısınalyq pýnkttiń aýyldaǵy áleýmettik ınfraqurylymdy nyǵaıtyp, turǵyndarǵa kórsetiletin medısınalyq qyzmet sapasyn arttyrýǵa septigin tıgizetinin atap ótti.