Ǵylym jáne joǵary bilim mınıstrliginiń málimetinshe, bıyl elimizdiń joǵary oqý oryndarynda 88 memleketten kelgen 35 075 sheteldik stýdent bilim alyp jatyr. Kásibı bilim úshin Qazaqstandy tańdaıtyn sheteldik jastardyń úlesi ótken jylmen salystyrǵanda 11%-ǵa artqan, dep jazady Egemen.kz.
Sheteldik stýdentterdiń qurylymy, bilim alýshylar geografııasy jyldan-jylǵa keńeıip keledi. Kósh bastap turǵan memleketter qatarynda Úndistan (9 959), Túrikmenstan (9 089), О́zbekstan (4 136), Qytaı (3 367) jáne Reseı (2 426) bar.
Sheteldik stýdentterdiń basym bóligi Almaty, Astana, Shymkent qalalarynda bilim alýdy qup kóredi. Qazir 18 195 shetel stýdenti – Almatyda, 4 292 stýdent – Astanada, 3 645 stýdent – Shymentte bilimin shyńdap júr.
Ulttyq ýnıversıtetter sheteldik stýdentterdi tartýda strategııalyq draıverge aınalyp otyr.
Sheteldik stýdentter sany boıynsha úzdik 5 ýnıversıtet:
1. Ál-Farabı atyndaǵy QazUÝ – 4 497;
2. S.Asfendııarov atyndaǵy QazUMÝ – 2 687;
3. L.Gýmılev atyndaǵy EUÝ – 2 483;
4. Q.Sátbaev atyndaǵy QazUTZÝ – 1 759;
5. M.Áýezov atyndaǵy OQMÝ – 1 730.
Shetten keletin izdenýshilerdiń densaýlyq saqtaý jáne medısına, pedagogıka, bıznes jáne quqyq, ınjenerııa, aqparattyq tehnologııalar syndy baǵyttarda bilim alýǵa suranysy joǵary.
Vedomstvo ózge elden kelip, bilim alýshylardyń qatary Qazaqstandaǵy bilim sapasynyń joǵary ári oqý aqysynyń qoljetimdi bolýyna baılanysty artyp otyrǵanyn málimdedi.
«Sońǵy jyldardaǵy joǵary bilim berý reformalary, jetekshi sheteldik ýnıversıtet fılıaldarynyń ashylýy, ǵylymı klasterlerdiń damýy, standarttardyń jańartylýy jáne halyqaralyq akademııalyq jelilerdiń keńeıýi salanyń eksporttyq áleýetin turaqty arttyrýǵa jaǵdaı jasap keledi. Naqty derekter Qazaqstannyń Ortalyq Azııadaǵy iri bilim berý ortalyqtarynyń qatarynda ǵana emes, sonymen birge óńirlik kadr daıarlaý úderisterine yqpal etetin óz bilim berý habyn qalyptastyryp kele jatqanyn dáleldeıdi», delingen mınıstrlik taratqan habarlamada.