Aqmola oblysynyń Qoıandy aýylynda jaıaý júrginshiler ótkelinen ótip bara jatqan eki jetkinshek qyzdy kólik qaǵyp ketti. Polısııa tergeý bastalǵanyn málimdedi, dep habarlaıdy Egemen.kz.
Oqıǵa beınebaqylaýǵa túsip qalǵan. Vıdeodan jaıaý júrginshiler ótkelinen ótip bara jatqan eki qyzdy kólik qaǵyp ótkenin anyq kórýge bolady.
Anyqtalǵandaı, zardap shekkenderdiń bireýi besinshi, ekinshisi onynshy synyp oqýshylary. Olar sabaqqa bara jatqan.
Aqmola oblystyq Polısııa departamentiniń ókilderi oqıǵa 1 jeltoqsanda bolǵanyn habarlady. Polısııanyń málimetinshe, «Nissan Primera» avtokóliginiń júrgizýshisi jaıaý júrginshiler ótkelinen ótip bara jatqan eki kámeletke tolmaǵan qyzdy qaǵyp ketken.
«Zardap shekkender aýrýhanaǵa jetkizildi. Jol-kólik oqıǵasy faktisi boıynsha tergeý bastaldy», delingen polısııa habarlamasynda.