Astana sotynda múgedek balalardyń ata-analaryna qatysty ádepsiz jáne qorlaıtyn sózder aıtqan blogerge qatysty ákimshilik is qaraldy, dep habarlaıdy Egemen.kz.
Is materıalyna sáıkes, O. óziniń Instagram paraqshasynda beınematerıal jarııalap, onda qoǵamǵa jáne múmkindigi shekteýli adamdarǵa qatysty qorlaıtyn jáne beıádep sózder qoldanǵany, sol arqyly qoǵamǵa ashyq túrde qurmetsizdik kórsetip, tártipti buzǵany anyqtaldy.
«Qylmystyq is boıynsha sotqa deıingi tergep-tekserý júrgizilgen joq, sebebi ınkrımınasııalanyp otyrǵan is-áreket tek ákimshilik óndiris sheńberinde qaralady», dep jazylǵan sot habarlamasynda.
Sot otyrysynda O. kinásin ishinara moıyndady: beıádep sózder qoldanǵanyn rastaǵanymen, balalardy qorlaý nıeti bolmaǵanyn kórsetti.
ÁQBtK 50-babynyń 2-bóligine sáıkes, 14 jasqa deıingi balalary bar áıelderge ákimshilik qamaý qoldanylmaıdy. O.-nyń 2016 jyly týǵan kámeletke tolmaǵan balasy bar ekeni týý týraly kýálik arqyly rastaldy.
Sotta jaýaptylyqty aýyrlatatyn mán-jaılar anyqtamaldy. O.-nyń kámeletke tolmaǵan balasynyń bolýy jeńildetetin mán-jaı retinde tanyldy.
«Quqyq buzýshylyqtyń sıpaty jáne jeńildetetin mán-jaıdyń bolýy eskerilip, O.-ǵa ÁQBtK 434-baby 1-bóligi boıynsha AEK mólsherinde, ıaǵnı 78 640 teńge aıyppul salyndy. Sot qaýlysy zańdy kúshine engen joq», deıdi sot.