Kásip bastap, is aıasyn keńeıtip jatqandar týraly sóz bola qalsa, «tanysy kóptiń tabysy da kóp bolady» dep baılam jasaıtyndar bar áli bizde. Salanyń qyr-syryn bilmeıtinderge kásipker jyldap jınaǵan qoryn jumsap, birden berekege kenele ketkendeı kórinip turady. Keıipkerimiz Jadyra Jumabekovanyń bastamasy jańaǵydaı oı jeteginde júrgenderge berilgen jaýap sııaqty.
Osy kúni jurttyń kóbi jaqsylyq pen jańalyqty qaladan izdeıtin boldy ǵoı. Jadyra bul baılammen kelise bermeıdi. Syrdarııa aýdanyndaǵy Shirkeıli aýylynda týyp, Qyzylordadaǵy Qorqyt ata ýnıversıtetinde oqydy. Segiz jyl buryn qalaǵa kelin bolyp túsip, jumysty da shahardan tapty. Balabaqshada, korreksııalyq ortalyqta jumys istedi. Jumysy kidirip, úıge qamalyp qalǵan pandemııa kezinde bir jalaqyǵa ǵana senip júre bermeý kerektigin túsingendeı boldy. Qurt qaınatyp, maı shaıqaǵan aýylda óskendigi tyǵyryqtan shyǵardy.
«Sol tusta dekrettik demalysta bolatynmyn. Úıde otyryp, toı dastarqanyna laıyqtap taǵamdar isteýge kiristim. Alǵashqy tutynýshylarym – áleýmettik jeli arqyly jasaǵan jarnamamen tanysqan kórshilerim edi», deıdi Jadyra.
Kásibin keńeıtý maqsatynda qarjylaı qoldaýǵa bergen ótinishi eki jyl qatarynan keri qaıtqan kezi de boldy. Biraq taýy shaǵylǵan joq. «Bıznes bastaý» jobasy sheńberinde kásipkerlik negizderin oqytýdyń onlaın kýrsyn aıaqtap, byltyr Jańa bıznes-ıdeıalardy iske asyrýǵa arnalǵan memlekettik granttardy berý jónindegi komıssııanyń sheshimine sáıkes 1 572 800 teńge kóleminde memlekettik grant utyp aldy.
Jasaǵan bıznes jospary sút ónimderine qatysty edi. Grant qarjysyna 55 lıtrlik elektr kúbi aldy. Josparmen jumsalǵan qarjy sút tartatyn separator, eki buzaýly sıyr alýǵa da jetti. Osy kúni Jadyra ázirlegen aıran, qatyqty, súzbesi men irimshigin jurt talasa alady. Kásipker aǵarǵannan eshqandaı qaldyq qalmaıtynyn aıtady. Eń sońǵy sarysýynyń ishek mıkroflorasyn jóndep, ótti durystaıtyn qasıeti bar.
«Mansap» ortalyǵy qoldaý alǵan kásipkerlerdi túrli kórmeden qaldyrmaıdy. Soǵan barǵanda ózi sekildi kóptegen kelinshekpen tanysty. Barlyǵy ózi sekildi kópbalaly analar eken. Mundaı is-sharalar – tájirıbe almasyp, is aýqymyn keńeıtýge taptyrmas múmkindik alańy. О́ıtkeni bıznes básekeden ǵana turmaıdy. Isti alǵa ilgeriletetin ıdeıalar da osyndaı kezdesýlerde týady.
«Jazdyń kúnderi dúkenderge ashytpa, bıdaı, júgeri kójelerin, ózim daıyndaǵan kompotty ótkizemin. Eldiń osy kúni quramynda hımııalyq qosyndysy kóp, kúmándi azyq-túlikten bas tartyp, taza ónimderge suranysy kóbeıip kele jatqany baıqalady. Soǵan qýanamyn. О́ıtkeni sapaly as – saýlyqtyń kepili», deıdi kásipker.
Kásipte memleket qoldaýy kóp múmkindikke jol ashatynynyń bir dáleli – osy Jadyranyń bastamasy. Mamandyǵy jónindegi jumysty tastap, birjola bızneske bet burdy. Isin jolǵa qoıyp, el ekonomıkasynyń damýyna óz úlesin qosyp otyrǵan jan alda kásibiniń aıasyn keńeıte túsýdi josparlap otyr. Al talpynǵannyń tabysy kóp bolady.
QYZYLORDA