Senat tóraǵasy Máýlen Áshimbaev Palestınanyń Joǵarǵy sýdıasy, Palestına Prezıdentiniń din isteri jónindegi keńesshisi Doktor Mahmud Sedkı Ál-Habbashpen kezdesti. Taraptar halyqaralyq uıymdar sheńberinde eki el arasyndaǵy yntymaqtastyqty nyǵaıtý máselelerin talqylady jáne Gaza sektoryndaǵy gýmanıtarlyq ahýal jóninde pikir almasty.
Palata spıkeri meımanǵa iltıpat bildirip, Qazaqstan Palestınany arab álemindegi mańyzdy seriktesterdiń biri retinde qarastyratynyn jáne eki el arasynda túrli saladaǵy qatynastardy damytýǵa múddeli ekenin atap ótti. Kezdesýde ekijaqty dostyq qarym-qatynastardy nyǵaıtýǵa joǵary deńgeıdegi belsendi jáne senimdi dıalogtiń yqpaly zor ekeni de sóz boldy.
«Búginde eki el arasynda saıası dıalog joǵary deńgeıde jalǵasyp keledi. Palestına Prezıdenti Mahmud Abbastyń 2022 jyly Astanada ótken Azııadaǵy ózara is-qımyl jáne senim sharalary jónindegi keńestiń VI sammıtine qatysýy – sonyń aıqyn dáleli. Sammıt aıasynda Qazaqstan Prezıdenti Qasym-Jomart Toqaev Palestına Prezıdentimen kezdeskenin erekshe atap ótken jón. Bul kelissózder eki el arasyndaǵy ózara túsinistik pen seriktestikti nyǵaıtýǵa mańyzdy serpin berdi. Biz aldaǵy ýaqytta da sizderdiń elderińizben túrli saladaǵy yntymaqtastyqty damytýǵa múddelimiz ári Palestınany nyǵaıtýǵa baǵyttalǵan bastamalardy árdaıym qoldaımyz», dedi M.Áshimbaev.
Sonymen qatar Senat tóraǵasy Gaza sektoryndaǵy buryn-sońdy bolmaǵan gýmanıtarlyq ahýalǵa alańdaýshylyq bildirdi. Ol beıbit turǵyndardyń zardap shegýi qabyrǵany qaıystyratynyn aıtyp, janjaldy dıplomatııalyq jolmen sheshýdiń mańyzdy ekenin tilge tıek etti.
«Qazaqstan Birikken Ulttar Uıymynyń tıisti qararlaryna sáıkes, Palestına halqynyń zańdy quqyqtaryn, sondaı-aq «eki halyq úshin eki memleket» qaǵıdatyn dáıekti túrde qoldaıdy. Qazaqstan Prezıdenti Qasym-Jomart Toqaev atap ótkendeı, janjaldy dıplomatııalyq jolmen sheshý – turaqty beıbitshilik pen qaýipsizdikke qol jetkizýdiń jalǵyz joly. Bizdiń basty qaǵıdatymyz – gýmanıtarlyq kómektiń qaýipsiz, úzdiksiz, shartsyz qoljetimdi bolýy, azamattardyń qorǵalýy jáne ınfraqurylymnyń qalpyna keltirilýi», dep M.Áshimbaev eki eldiń Azyq-túlik qaýipsizdigi jónindegi Islam uıymy, Islam Yntymaqtastyǵy Uıymy jáne basqa da ınstıtýttar men halyqaralyq uıymdar aıasyndaǵy ózara is-qımyldyń basym baǵyttaryna nazar aýdardy.
Sondaı-aq taraptar Álemdik jáne dástúrli dinder kóshbasshylarynyń sezi sheńberindegi birlesken jumysty talqylap, qaqtyǵystardy beıbit jolmen sheshýdiń jáne rýhanı dıplomatııany damytýdyń mańyzy jóninde suhbat qurdy.