Úkimet Aýyl sharýashylyǵy mınıstrligi men «Túrkistan maqta agroónerkásiptik kesheni» JShS arasynda Túrkistan oblysynda shıtti maqtany ósirý men tereń óńdeý jónindegi ınvestısııalar týraly kelisim jasaýdy maquldady. Tıisti qaýlyǵa Premer-mınıstr Oljas Bektenov qol qoıdy.
Joba Memleket basshysynyń aýyl sharýashylyǵy salasyn damytý men ozyq agrotehnologııalardy engizýge qatysty tapsyrmalaryn júzege asyrýdy kózdeıdi. Maqsaty – alqapta maqta ósirýden bastap daıyn kıim óndirýge deıin óndiristiń tolyq sıklin qalyptastyrý. Nátıjesinde, Otyrar aýdany men Arys qalasynda 60 myń ga sýarmaly jer alańynda Ortalyq Azııadaǵy iri maqta ósirý keshenin qurý josparlanyp jatyr. 1,4 myńnan astam turaqty, 300-den astam ýaqytsha jumys orny ashylady.
Investor – qytaılyq Xinjiang Lihua (Group) Co., Ltd. kompanııasy. Jobany júzege asyrýdyń birinshi kezeńinde 58 mlrd teńgeden astam ınvestısııa kózdelgen, sheteldik ınvestısııalardyń jalpy kólemi 200 mlrd teńgeden asady, bul týraly buryn Premer-mınıstr Oljas Bektenov pen Xinjiang Lihua basshysy Chjan Sıhaıdyń kelissózderi barysynda ýaǵdalastyqtarǵa qol jetkizildi.
Tamshylatyp sýarýdyń tıimdiligi joǵary, júıe 196 sorǵy stansasyn, 500 shaqyrymnan astam sýarý men taratý arnalaryn, úsh iri sorǵy keshenin, úsh transformatorlyq qosalqy stansany, tyńaıtqyshtardy ıntegrasııalanǵan ádispen berý júıesin, sondaı-aq álemdik jetekshi óndirýshilerdiń zamanaýı aýyl sharýashylyǵy tehnıkasyn – joǵary qýatty traktorlardy, maqta jınaý mashınalaryn, búrikkishter, mamandandyrylǵan qurylys tehnıkasyn paıdalanady.
Sonymen qatar keshen aýmaǵynda polıetılendi qaıta óńdeý men tamshylatyp sýarýǵa arnalǵan qural men ıilgish qubyrlardy shyǵarý jelisi qurylady, bul ımportqa táýeldilikti azaıtýǵa ári maqta ósirýden bastap ıirilgen jip, matalar men kıimderdi shyǵarýǵa deıingi tuıyq óndiristik sıkldi qalyptastyrýǵa múmkindik beredi. Búginde elimizde jyl saıyn 70–75 myń tonna maqta talshyǵy óndiriledi, onyń 85%-y eksporttalady.
Jobany júzege asyrý el ishinde tereń qaıta óńdeý úlesin ulǵaıtýǵa, qosylǵan quny joǵary daıyn toqyma ónimderin shyǵarýdy keńeıtýge múmkindik beredi. Bul, tutastaı alǵanda, otandyq toqyma ónerkásibiniń óndiristik bazasyn nyǵaıtady, eksporttyq áleýetti arttyrady, sondaı-aq shaǵyn jáne orta bıznesti – logıstıkany, tehnıkany jóndeýdi ári aýyl sharýashylyǵy ónimderin qaıta óńdeýdi damytýda draıver bolady.