Almatyda balalar arasyndaǵy JRVI derekteriniń ósýine baılanysty jańa jyldyq is-sharalardy ótkizý shektelýi múmkin. Degenmen, qalada tolyq tyıym salý ázirge qarastyrylmaǵan. Bul týraly qalalyq sanıtarlyq-epıdemıologııalyq baqylaý departamenti basshysynyń orynbasary Asel Qalykova aıtty, dep habarlaıdy Egemen.kz.
Asel Qalyqovanyń aıtýynsha, indettiń órshý kezeńinde kópshilik is-sharalardy shekteý usynylady. Alaıda, qazirgi ýaqytta tolyq tyıym salý qarastyrylmaıdy, óıtkeni sońǵy aptadaǵy JRVI kórsetkishi aldyńǵy aptamen salystyrǵanda 1,5 eseden kóp artpaǵan.
«Jalpy, kópshilik jınalatyn sharalardy barynsha shekteý, ıaǵnı merekelerdi basqa formatta ótkizý, qajet. Bul balalardyń jappaı jınalýyn boldyrmaýǵa múmkindik beredi», dedi Qalykova.
Ol sonymen qatar, is-sharalardan buryn balalardy mindetti túrde medısınalyq teseristen ótkizý kerektigin atap ótti. Iаǵnı, kimniń sabaqqa kelmegenin, qandaı sebeptermen joq bolǵanyn anyqtaý arqyly merekelik sharalarǵa naýqas nemese JRVI belgileri bar balalardyń qatysýyn boldyrmaýǵa bolady.
Qalyqovanyń sózinshe, Almatydaǵy mektepter men balabaqshalar áli de shtattyq rejımde jumys isteıdi. Qashyqtan oqýǵa aýysý ázirge qarastyrylmaǵan, sebebi naýqas balalardyń sany 30%-dan aspaıdy.
Aıta keteıik, qyrkúıekten qarashanyń basyna deıin balalar arasyndaǵy JRVI kórsetkishi 59,1%-dy qurap, 102 575 jaǵdaı tirkeldi. Onyń ishinde 108 bala pnevmonııamen aýrýhanaǵa jatqyzyldy.
Sońǵy aptada qala boıynsha 178 mektepten 1930 JRVI jaǵdaıy tirkelip, keıbir mektepterde oqýshylar arasyndaǵy naýqastaný deńgeıi 10%-ǵa jetken.