D. Serikbaev atyndaǵy Shyǵys Qazaqstan tehnıkalyq ýnıversıtetinde «SMART Driving Technology» ınjınırıng ortalyǵynyń ashylýy ótti. Ortalyqtyń ashylýymen Qazaqstan jáne Qytaı arasyndaǵy ınjenerlik bilim berý halyqaralyq yntymaqtastyǵynyń negizgi jobasy Lý Ban sheberhanasy damýdyń jańa deńgeıine kóterildi, dep habarlaıdy Egemen.kz.
Lý Ban sheberhanasy qurylǵan sátten bastap tek oqý alańy ǵana emes, bolashaqtyń avtomobıl salasyna mamandar daıarlaýǵa baǵyttalǵan zamanaýı bilim berý jáne ınnovasııalyq ortalyqqa aınaldy. Búginde munda Qazaqstannan jáne shetelden kelgen stýdentter elektromobılder tehnologııasyn, gıbrıdti kúsh qondyrǵylaryn, ıntellektýaldy kólik júıelerin, jasandy ıntellektti jáne avtonomdy júrgizý tehnologııalaryn meńgeredi. «SMART Driving Technology» ortalyǵynyń ashylýy tehnologııalyq ekojúıeni odan ári nyǵaıtyp, jańa býyn gıbrıdti jáne elektrli avtomobılderge, avtopılot platformalaryna, AR/VR sımýlıasııalyq keshenderine jáne sıfrlyq negizderge qoljetimdilikti keńeıtti.
Saltanatty jıynda Ǵylym jáne joǵary bilim vıse-mınıstri Gúlnar Kobenova jańa ortalyqtyń Prezıdent qoıǵan mindetterge tolyq sáıkes keletinin atap ótti.
– Prezıdenttiń «Jasandy ıntellekt dáýirindegi Qazaqstan» Joldaýynda pılotsyz jáne smart-kólik tehnologııalaryn jedel damytý qajettiligi erekshe aıtylǵan. Ortalyqtyń ashylýy – ulttyq tehnologııalyq quzyretter jelisin qalyptastyrýdaǵy mańyzdy qadam. Shyǵys Qazaqstan myqty ınjenerlik mektepke ıe. Al ShQTÝ bilim, ǵylym jáne ınnovasııany tabysty ushtastyryp keledi. Bul ortalyq bolashaqqa qajetti quzyretterdi damytyp, elimizge jáne shetelge qajet joǵary bilikti mamandardy daıarlaýǵa múmkindik beredi, – dedi G. Kóbenova.
Tıanszın kásiptik ýnıversıtetiniń prezıdenti Ý Szýnbao óz sózinde jobanyń serpindi damýyn erekshe atap ótti.
– Lý Ban sheberhanasy Qytaı men Qazaqstan yntymaqtastyǵynyń jańa belesi. Jobanyń birinshi kezeńi 2023 jyly iske qosylsa, búgin ekinshi kezeńi ashyldy. ShQTÝ ındýstrııanyń qajettilikterin bilim berý úderisimen tereń ıntegrasııalaý arqyly joǵary nátıjeler kórsetip keledi. Intellektýaldy kólik júıeleri ınjenerlik ortalyǵy ozyq avtomobıl tehnologııalaryn damytýǵa jáne Qazaqstan úshin joǵary bilikti mamandar daıarlaýǵa yqpal etedi, – dedi Ý. Szýnbao.
Iá, jańa beleske jetken sheberhanadan shyńdalyp shyqqan túlekter zamannyń aǵymyna qaraı jańa qyzmet túrlerin kórsetýge ábden mashyqtanǵan. Munda bilim de, bilik te shyńdala túsedi.
О́skemen