Elbasy Nursultan Nazarbaev Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarovty qabyldady, dep habarlady Prezıdenttiń baspasóz qyzmeti.
Kezdesý barysynda Q.Qojamjarov Memleket basshysyna agenttiktiń qazirgi qyzmeti, sondaı-aq, memlekettik qyzmetti kásibılendirý jáne tıimdiligin arttyrý maqsatynda atqarylyp jatqan sharalar týraly baıandady.
Nursultan Nazarbaev byltyr qurylǵan vedomstvonyń aldynda memlekettik qyzmet júıesin jetildirý, sybaılas jemqorlyq quqyq buzýshylyqtaryna qarsy is-qımyldy qamtamasyz etý turǵysynan mańyzdy mindetter turǵanyna nazar aýdardy.
Qazaqstan Prezıdenti eldiń ornyqty ósimi men turaqtylyǵyn qamtamasyz etý úshin memlekettik apparattyń tıimdiligin odan ári arttyrýdyń mańyzdylyǵyna toqtaldy.
Agenttik tóraǵasy, sondaı-aq, Jańa memlekettik qyzmet modeliniń tujyrymdamasynda belgilengen reformalardyń birinshi kezeńin baǵalaý jáne monıtorıng qorytyndylary týraly baıandady.
Júzege asyrý kezinde barynsha pysyqtaýdy jáne keshendi tásilderdi qajet etetin birqatar sharalar atap ótildi. Atap aıtqanda, memlekettik qyzmetke irikteýdiń ashyqtyǵyn arttyrý, memlekettik qyzmetshilerdiń qyzmetin sapaly baǵalaýdy engizý, olardy oqytý jáne yntalandyrý júıesin damytý jóninde usynystar jasaldy.
Q. Qojamjarov agenttik jumysynyń memlekettik qyzmettiń barlyq kezeńinde talanttardy basqarýdyń qaǵıdattary men tetikterin engizý sııaqty tujyrymdamalyq jańa baǵyttary týraly áńgimeledi. Sondaı-aq, sybaılas jemqorlyqqa qarsy aǵartý sharalary týraly da aıtyldy. Onyń aıasynda Bilim jáne ǵylym mınıstrligimen birlesip, bilim berýdiń barlyq deńgeıinde jáne túrli maqsatty toptar úshin sybaılas jemqorlyqqa qarsy áreket etý máselelerin zertteý qarastyrylǵan.
Kezdesý qorytyndysy boıynsha Memleket basshysy birqatar naqty tapsyrma berdi.
Sýretti túsirgender
S.BONDARENKO, B.OTARBAEV.