Belgili memleket jáne qoǵam qaıratkeri, ǵalym, fılosofııa ǵylymdarynyń doktory, professor, Qazaqstan Respýblıkasy Ulttyq ǵylym akademııasynyń akademıgi, Qazaqstannyń eńbek sińirgen ǵylym qaıratkeri, L.N.Gýmılev atyndaǵy Eýrazııa ulttyq ýnıversıtetiniń professory Jabaıhan Múbárákuly Ábdildın ómirden ótti degen sýyq habar kóńilimizdi qulazytyp ketti. Ol zamanymyzdyń zańǵar tulǵasy edi.
J.Ábdildınniń basshylyǵymen burynǵy Keńes odaǵyna jáne shetelderge keńinen tanymal fılosofııalyq mektep qalyptasty. Týǵan eline azamattyq berik ustanymymen de, ǵylym jolyndaǵy qabilet-qarymymen de aıanbaı qyzmet etti. Sońynda óshpeıtin ónegeli, aıshyqty izi qaldy.
J.Ábdildınniń ǵylymı eńbekteri, negizinen, dıalektıkalyq logıkanyń ózekti máselelerin zertteýge arnaldy. Onyń basqarýymen osy baǵytta ujymdyq monografııalar jaryq kórdi. Dıalektıkanyń ǵylymı júıesi jasaldy. Ol qazirgi jaratylystaný ǵylymdarynyń metodologııalyq máselelerimen ushtastyryldy.
Ýnıversıtetimizdiń professory Jabaıhan Múbárák-ulynyń fılosofııanyń irgeli máseleleri – tanym teorııasyn, dıalektıkanyń ámbebap zańdylyqtary men kategorııalaryn, onyń ishki logıkalyq baılanystary men ádistemesin, álemdik fılosofııa tarıhyn, onyń basty ókilderiniń kózqarastaryn stýdent-jastar qaýymy yjdaǵatpen oqyp-úırendi.
Qaıratker J.Ábdildın azamat retinde jazyqsyz qurban bolǵan Alash arystaryn aqtaý jónindegi komıssııany basqaryp, olardyń aqtalyp, eńbekteriniń jaryq kórýine aıryqsha atsalysty. Shákárim, Maǵjan, Júsipbek, Ahmet pen Mirjaqypty týǵan halqymen qaıta qaýyshtyryp, shyǵarmashylyq muralarynyń el ıgiligine aınalýyna sebepker boldy. Eli, jeri, tipti kúlli adamzat úshin de tyndyrǵan isi zor desek, artyq aıtpaımyz. Biregeı jaratylǵan, dańǵaza men daqpyrtqa, dandaısýǵa jany qas azamat edi. Qaı iste de ar men adaldyqty, sabyr men salmaqtylyqty bıik qoıatyn.
Jabaıhan Ábdildın – adamzat pen ǵalamzattyń dara qubylysy. Otandyq fılosofııa ǵylymynyń damýyna, táýelsiz elimizdiń órkendeýine ólsheýsiz úles qosqan zııaly tulǵa edi. Ol shyn máninde kisilik pen danalyqtyń úlgisindeı, ádildiktiń tarazysyndaı abyz aqsaqalymyz bolatyn.
Adamgershilik qasıeti mol, jany jaısań, júregi kirshiksiz abzal azamattyń elge sińirgen eńbegi men jarqyn dıdaryn halqymyz árdaıym jadynda saqtaıdy dep senemiz. Onyń ǵylymdaǵy mol murasy men ǵıbratty ǵumyry keıingi urpaqqa úlgi bolyp qala bermek.
L.N.Gýmılev atyndaǵy EUÝ ujymy