Qazaq ádebıetindegi kásibı aýdarma Abaıdan bastalady deıdi aýdarmashy, dramatýrg Kenjebaı Ahmet. Qazirgi aýdarma qandaı bolý kerek degen suraqqa kirispeni osylaısha bastady. Abaı basqa zamanda ómir súrdi. Aýdarmalarynyń kóbinde «álemde osyndaı ádebıet úlgileri bar» dep birinshiden aǵartýshylyq baǵytty kózdese, ekinshi jaǵynan aýdarǵan avtorlarymen ishteı jarysqa túsip, básekeleskendeı kórinedi. «Sen myna taqyrypty osylaı jyrlaǵan ekensiń, men sony dálme-dál qotara otyryp, osylaı qosar edim» degendeı mysaldardy ańǵaramyz.
Astana qalasy tilderdi damytý jáne arhıv basqarmasy men Jazýshylar odaǵy Astana fılıaly qolǵa alǵan «Qalamger ustahanasynyń» ádebı leksııasyn bul joly ádettegideı aqyn Baýyrjan Babajanuly ashyp berdi. Basqalaryn aıtpaǵanda, Dj.Bokkachchonyń «Dekameron novellalaryn», Danteniń «Qudiretti komedııasyn», Stefan Sveıgtiń «Balzagyn» aýdarǵan Kenjebaı Ahmet áńgimesin álgindeı sabaqtady. Dáriskerdiń aıtýynsha, avtor stılin saqtaı otyra dálme-dál aýdarma jasaǵan alǵashqylardyń biri – Maǵjan Jumabaev. Shamaly ǵana tárjimelerin túpnusqamen salystyrǵanda, aıyrmashylyq baıqala qoımaıdy. Kólemi, maǵynasy, býyn sany, uıqasynyń ózin birdeı keltirgen. Tek qana Kolsovtan aýdarǵan segiz býyndyq «Pesnıa starıka» óleńin on bir býynǵa sozǵan. Sóıtsek, Kolsov shyǵarmasyn orys áýenimen jazsa, Maǵjan ony halyq ánderindeı qara óleń sarynyna túsirip, áýezine mán bergen.
Shyǵarma túpnusqada qandaı bolsa, aýdarmada da sondaı bolǵany basty talap deıdi aýdarmashy. Týyndyny jeńildetý, oqyrmanǵa túsinikti etý nemese kúrdelendirý degender júrmeıdi. Tipti avtor kózqarasynda siz kelispeıtin nárse bar ma – meıli, sol qalpynda qotarylýǵa tıis. Tigisin jatqyzyp jiberýge qaqyńyz joq. Avtordyń oıy men jazý ereksheligin saqtaý mindet. Kóbine tárjimeshi sózge ǵana nazar aýdaryp ketedi. Biraq sózbe sóz aýdarý shart emes. Sóılem astaryndaǵy reńk pen boıaý kóriný kerek. Arasynda jazýshy mysqyldap otyrýy múmkin. Keri sóıleý arqyly keıde túzik aıtyp otyrýy da ǵajap emes. Jalpy, sıpattaýmen birge osyndaı erekshelikter túgelimen qotarylsa – quba-qup.
Aýdarmashynyń jeńisi – túpnusqadaǵy sezimdi qazaq oqyrmanyna sol qalpynda tanytý. Ol qaı tilge qotarady, sol tildi jaqsy bilýge tıis. Orys tilindegi «byl» degen sózdi sezinbegen adam boldy dep usyna salady. Ol álgi jerde boldy ma, bolypty ma, bolǵan ba, bolǵan eken be, sezinip bergen mańyzdy. Iаǵnı tildi bilý degen sózdi jattap alý emes. Sózdiń boıaýy, máni, reńki, tipti basqa maǵynada oınap turatyn kezin de túsinip jáne sony dál aýdarý.
Aýdarmashy áýeli kimdi aýdaratynyn jáne qotaratyn shyǵarmasyn tanyp alǵany lázim. Kandıdat, doktor dárejesi shart emes, alaıda belgili bir deńgeıde zertteýshi bolýǵa tıis. Máselen, bir avtor ár shyǵarmasynda túrli qyrynan kórinýi múmkin. Mysaly, Stefan Sveıg birde ertegishi retinde jazsa, keıde ázildep ıýmor aralastyryp, endi birde fılosof retinde áńgimeleıdi. Psıholog turǵysynan da jazǵandaryna ushyrastyq. Ár shyǵarmasynda ártúrli qyrynan kórinedi. Aınalyp kelgende málimetiniń óte kóptigi, biliminiń moldyǵy ertegi jazsa da baıqalady. Al aýdarmashy sony sezinýi kerek. Naqty bilmese de, jobalap, sol aýyldyń tóńiregin sharlap ótetindeı qabilet tabylý kerek boıynan. Áıtpese, eńbek zaıa.
«Sheberligiń jetip jatsa, orys tilinde eki sózben bergen nárseni bir-aq sózben sezdirip ótýge týra keledi. Epıkalyq, dramalyq úlgidegi shyǵarmalardy aýdarý poezııaǵa qaraǵanda jeńildeý. Qıyny, lırıkalyq poezııany aýdarý. Lırıkada sezim, áser, emosııa bar, onyń sózin ǵana alyp berseń, jansyz shyǵady. Demek, óleńniń qasıetin túsinip, ana aqynǵa aınalyp, qaıtadan qazaqqa qaıtyp kelýińiz kerek qoı. Lırıkalyq poezııany aýdarýdyń qıyndyǵy osynda.
Aýdarmashy avtordyń bir kóshirmesi sııaqty bolýy kerek, onyń ózi aýdarmany jasap otyrǵan kezde sol sııaqty oılanyp, sol sııaqty kórip, sol sııaqty baǵalap, sol sııaqty áserlenip, jek kórse jek kórip, jaqsy kórse jaqsy kórip otyrǵan kezde, ıaǵnı shyǵarmaǵa enýi kerek qoı. Avtordyń ózi sııaqty. Sonda aýdarma júredi. Al sýyq qarap aýdara salǵan bolmaıdy» deıdi Kenjebaı Ahmet.