UQK-niń Qostanaı oblystyq shekara qyzmeti departamentinde Otan aldyndaǵy áskerı boryshyn abyroımen ótep qaıtqan sarbazdarǵa tegin bilim grantyn tapsyrý rásimi ótti.
Saltanatty jıynda departament bastyǵynyń orynbasary, polkovnık Madııar О́telbaev áskerı mindetin adal atqarǵan, qyzmet barysynda buljymas tártip pen joǵary jaýapkershiliktiń úlgisin kórsetken jaýyngerlerdi qoldaý shekara qyzmetiniń mańyzdy mindetiniń biri ekenin aıtty.
«Shekara shebindegi qyzmet – adam minezin shynyqtyratyn úlken mektep. Al búgingi saltanatty is-sharada sarbazdarǵa berilgen memlekettik granttar jastardyń tegin bilim alyp, keleshekte kásibı maman, laıyqty azamat bolyp qalyptasýyna jolashar bolady degen senimdemin», dedi M.О́telbaev.
Memlekettik grantqa ıe bolǵan jaýyngerdiń biri, Lısakov qalasynyń turǵyny Dámir Nurqanov ásker qataryna ótken jyly qyrkúıek aıynda attanǵan. Bir jyl Kúrshim, Zaısanda shekara shebin kúzetip, merzimi aıaqtalǵan soń bıyl qyrkúıekte qaıtyp oraldy. Áskerge deıin tehnık-baǵdarlamashy mamandyǵy boıynsha arnaıy orta bilim alǵan Dámir Otan aldyndaǵy boryshyn múltiksiz atqarǵany úshin bilim grantyna laıyq sarbazdardyń qataryna da engen. Abyroı bolǵanda, irikteý konkýrsynan súrinbeı ótip, Ahmet Baıtursynuly atyndaǵy Qostanaı óńirlik ýnıversıtetine oqýǵa túsip otyr. Amandyq bolsa, 2026 jyldan bastap JOO stýdenti atanyp, «Mehanıka jáne metall óńdeý» mamandyǵynyń qyr-syryn ıgere bastaıdy.
«Jalpy, meniń ómirimdi áskerge deıingi jáne áskerden keıingi dep eki kezeńge bólýge bolady. Áskerı qyzmette júrip buryn ózim bilmegen kóp nárseni kórip-bildim. Aýyrtpalyqta tózimdi bolýdy, qıyndyqtan qoryqpaýdy, joldasyńa adal bolyp, aınalańdaǵy adamdarmen til tabysa bilýdi úırendim. Búgin oqý grantyn alyp erekshe qýanyp turmyn. Árıne, bul – men úshin úlken mártebe, jaýapkershilik. Ýnıversıtette joǵary bilim alyp ári qaraı eńbek etip, osy eldiń bir paıdaly, sapaly azamaty bolǵym keledi», deıdi Dámir.
Dámirmen birge bilim grantyn alǵan Alekseı Kozachenko da Kúrshim shekara basqarmasynyń «Kókjota» zastabynda bir jyl kólik júrgizgen. Alekseı áskerge deıin Qostanaı avtomobıl transporty kolledjinde oqyp, tehnıkalyq qyzmet kórsetýshi, avtomobıl transportyn jóndeýshi degen mamandyq alyp shyqqan. Endi áskerden keıin memlekettik grant qolyna tıip, aldaǵy jyldan bastap Aqań ýnıversıtetinde «Transporttyq tehnıka jáne tehnologııa» mamandyǵy boıynsha oqýyn jalǵastyrmaq.
«Birjyldyq qyzmet kóp nársege úıretti. Shekara shebinde boryshyn ótegen jaýynger úshin jaýapkershilik degen nárse kúndelikti ereje-daǵdyǵa aınalady. Azyn-aýlaq eńbegimdi baǵalap jatqan memleketke, shekara qyzmetinde júrip ózim tálim alǵan ofıserlerge, qarýlas joldastaryma alǵys aıtamyn», deıdi A.Kozachenko.
Departament bastyǵynyń orynbasary grant ıelerin quttyqtap, stýdent atanǵan sarbazdarǵa sáttilik tiledi.
«Shekara shebinde el tynyshtyǵyn qorǵaý – ońaı qyzmet emes. Sizder mindetti abyroımen atqardyńyzdar. Memleket eńbekterińizdi baǵalap, sizderge joǵary oqý oryndarynda tegin bilim alý múmkindigin berip otyr. Esterińizde bolsyn, shekarashynyń qyzmeti áskerden bosatý týraly buıryqpen aıaqtalmaıdy. Sizderdiń bir jyl ishinde jınaqtaǵan bilim-tájirıbelerińiz, áskerı ómirlerińiz qalyptastyrǵan tártip pen minez erteń el ıgiligine qyzmet etý kerek. Sizderdiń ýnıversıtette sapaly bilim alyp, keleshekte bilikti maman bolyp shyǵýlaryńyzǵa tilektespin», dedi polkovnık M.О́telbaev.
Qostanaı oblysy