Taǵdyrdyń salǵan isine qaıyspaı qarsy turý – qajyr-qaıraty kemel adamdardyń ǵana mańdaıyna jazylǵan sybaǵa. Kátepti qara nar ǵana kóteretin zilmaýyr júkti arqalaı júrip keleshektiń kókjıegine syǵalaǵan úlbiregen úmit sáýlesi jan júrekterin jylytyp, on eki múshesine sarqylyp bitpes kúsh-qýat quıatyndaı.
Ekaterına Reveniń de tartqan taýqymeti az emes. Áýel basta bári ret-retimen kele jatyr edi. Júrek qalaýymen tańdaǵan mamandyǵy – densaýlyq saqtaý salasy. 2019 jyly Kókshetaý medısına kolledjin támamdap, úlken ómirge joldama aldy. Birden Jarqaıyń aýdandyq aýrýhanasyna ornalasqan. Kókiregindegi kórikti armanǵa qoly jetkendeı, maqsat-muraty oryndalǵandaı. Endigisi shákirt kezinen ańsaǵan ómirdegi temirqazyq nysanasy tárizdi halyqqa adal qyzmet etý. Biraq ómirde barlyǵy óziń oılaǵandaı bolmaıdy eken. Ilkidegi darqan dalanyń danalyǵyn boıyna jınaǵan aqylman qarııalar mańdaıǵa jazylǵany deýshi edi. Tup-týra solaı bolyp shyqty. Oılamaǵan jerden mertigip qalǵany. Alǵashqy kúnderi saly sýǵa ketti. On ekide bir gúli ashylmaı jatyp tósek tartyp jatý, kisige kúni túsý qandaı aıanyshty. Neshe jerden qaıratty bolsań da jigeriń jasıtyndyǵy sózsiz. Burynǵylardyń aldym qarańǵy deıtini osy eken de... Erteńgi kúnniń qandaı syı daıyndap turǵandyǵyn boljap bilgen kim bar. Azappen eki jyl ótti. Kúnderdiń bir kúninde borkemiktene berýge bolmaıtyndyǵyn túısingen. О́zi bar kúsh-jigerin jınap, tas-túıin bekinip alǵa umtylmasa, tuńǵıyqtan sýyryp alyp shyǵar qudiret joq. Shynynda da solaı bolyp shyqty. Senim qoltyǵynan demegen qos perishte tárizdi alǵa jeteledi.
Janyna serik etkeni, kóńiline medeý bolǵany – sport. 2011 jyly múmkindigi shekteýli jandarǵa arnalǵan «Mergen» sport klýby shaqyrǵan. Áýeli jeńil atletıkadan bastady. Úmit oty laýlaı tústi. О́ziniń de qolynan is kelerine kámil sendi. Sol jyly ıadro ıterýden respýblıkalyq jarysqa qatysqan. Oblystyń atynan. Jerlesterin uıatqa qaldyrmady. Júldeger atandy. Bul tabysy qarshadaı qyzdy tipten qanattandyra tústi. Sportpen shyndap shuǵyldansań tabys atty bıiktik óz-ózinen jonyn tosa beredi eken. 100, 200 metr qashyqtyqta arbamen jarysýda oblys chempıony atandy. 2022 jyly ıadro ıterýden el chempıony boldy. 2023 jyly respýblıkalyq VI paralımpıadalyq jarysta top jardy. Tula boıynda shıyrshyq atqan kúsh-qýat paıda bolǵaly jarys ataýlydan júldesiz qalǵan jeri joq.
Eń basty jeńisi – mamandyǵyna, 2022 jyly alǵashqy eńbek jolyn bastaǵan aýrýhanaǵa qaıta oraldy. Áriptesteri arqa-jarqa. Ekaterınanyń boıyndaǵy kez kelgen adamnyń kókireginde paıda bola bermeıtin kúsh-qýatqa qaıran qalysqan. О́zderimen birge osyndaı qarapaıym, uly ómirge sheksiz ǵashyq sportshy qyzdyń jumys isteıtindigin maqtanysh etken. Shynynda da, tuńǵıyqtan shyǵa bilgen erligi kópke ónege. Shaǵyn aýdandaǵy halyq ta osy bir juldyzy jarqyrap júrgen, taǵdyrmen taıtalasqan sátte jigeri jasymaǵan Ekaterına Petrovnanyń basynan ótken synaqty jaqsy biletin. Árdaıym jyly ushyrap, kúlimdep qarsy alatyn medbıkeniń qatarǵa qosylǵanyna olar da birge qýanǵan.
«Basynda qolymnan keler me eken degen kúdigim de boldy, – deıdi Ekaterına Petrovna. – Áıtse de, shyn jylasa, soqyr kózden jas shyǵady degendeı, adamnyń jeńbeıtin qıyndyǵy bolmaıdy eken. Eń bastysy, jalaýly jasyl dúnıede jaqsylyq jamyraı jaýatyn kúnnen kúder úzbeý».
Aıtqany – aqıqat. Ony jaı ǵana sóz emes, isimen dáleldep otyr.
Aqmola oblysy,
Jarqaıyń aýdany