Erkin kúresten Olımpıadanyń qola júldegeri Daýlet Shabanbaı Pavlodar oblysynda sot aldynda jaýap beretin boldy, dep jazady Egemen.kz.
Sot málimetinshe, oǵan bılik ókilderine kúsh qoldandy degen aıyp taǵylǵan. Qosymsha derekter ázirge jarııa etilmedi. Tanymal balýan aldaǵy sot prosesine qatysý úshin Pavlodardaǵy tergeý ızolıatorynan jetkiziledi.
«Sotta Shabanbaı D.E.-ge QR QK 380-baby, 4-bólimi, 1-tarmaǵy boıynsha – eki jáne odan da kóp bılik ókilderine kúsh qoldaný faktisimen aıyp taǵylǵan qylmystyq is qaralyp jatyr», delingen qujatta.
Sot sheshimimen sportshyny negizgi tyńdaýǵa qatysýy úshin Pavlodardyń qylmystyq ister jónindegi mamandandyrylǵan mejraıondyq sotyna etaptaý týraly qaýly shyǵarylǵan.
Atalǵan bap boıynsha jaza 3 jyldan 7 jylǵa deıingi bas bostandyǵyn shekteý nemese aıyrýdy kózdeıdi.
Pavlodar oblysy dene shynyqtyrý jáne sport basqarmasynyń basshysy Azamat Imashevtyń aıtýynsha, 42 jastaǵy Daýlet Shabanbaı sporttyq mansabyn bes jyl buryn aıaqtaǵan. Sońǵy ret ol Qazaqstan chempıonatyna qatysyp, kúmis medal jeńip alǵan.
Sportshynyń aıtýly jetistigi – 2012 jylǵy London Olımpıadasynyń qola júldesi. Alaıda ol medaldy resmı túrde tek 2022 jyly Belgradta alǵan. О́ıtkeni Olımpıadanyń eki júldegeri dopıng qoldanǵany úshin dıskvalıfıkasııalanyp, sol kezde 120 kg salmaqta besinshi oryn alǵan qazaqstandyq sportshy úshinshi orynǵa kóterilgen.