Atyraýda Iаna Legkodımova isin ashqan asa mańyzdy ister jónindegi aǵa tergeýshi Temirhan Hajmuratovqa polısııa maıory arnaıy sheni merziminen buryn berildi, dep habarlaıdy Egemen.kz óńirlik Polısııa departamentine silteme jasap.
Vedomstvonyń baspasóz qyzmetiniń málimetinshe, Atyraý oblysy Polısııa departamentinde qyzmettik mindetterin atqarý kezinde joǵary kásibılik pen janqııarlyq tanytqan, sondaı-aq asa aýyr qylmysty ashýda erekshe kózge túsken qyzmetkerlerdi marapattaý rásimi ótti.
Asa mańyzdy ister jónindegi tergeý basqarmasynyń aǵa tergeýshisi, polısııa kapıtany Temirhan Hajmuratov tergeý áreketterin sapaly júrgizgeni jáne kásibı sheberligi úshin basshy quramnyń kezekten tys arnaıy sheni – «Polısııa maıory» ataǵyna ıe boldy.
Budan bólek, Ishki ister mınıstri, polısııa general-leıtenanty Erjan Sádenovtiń buıryǵymen polısııa podpolkovnıgi Aslan Smaǵul men polısııa maıory Naýryzbek Rahmanov «Quqyqtyq tártipti qamtamasyz etýge qosqan úlesi úshin» medalimen nagradtaldy.
Polısııa maıory Serijan Sábıtov pen polısııa kapıtany Gúlfarıdá Tólegenova «Ishki ister organdarynyń úzdigi» tósbelgisimen marapattaldy.
«Bul marapat 2024 jyly iz-túzsiz joǵalyp ketken Iаna Legkodımovaǵa qatysty asa aýyr qylmysty atyraýlyq polıseıler kásibı deńgeıde ashqany úshin berildi. Quqyq qorǵaýshylar beınebaqylaý kameralaryndaǵy jazbalardy taldap, keń kólemdi jedel-izdestirý is-sharalaryn uıymdastyrdy, eki kúdiktini anyqtap, isti tolyq ashýǵa qol jetkizdi. Sot eki aıyptyny da ómir boıyna bas bostandyǵynan aıyrý týraly úkim shyǵardy», dep habarlady Atyraý oblystyq PD.
Sonymen qatar marapattalǵan qyzmetkerlerdiń eńbegi men kásibıligi qoǵamdyq qaýipsizdikti qamtamasyz etýdegi quqyq qorǵaý júıesiniń jaýapkershiligi men senimdiliginiń aıqyn dáleli ekeni aıtyldy.
Eske salaıyq, 17 qarashada Atyraýda 23 jastaǵy Iаna Legkodımovany óltirý isi boıynsha sot úkimi jarııalandy.
Iаna Legkodımova 2024 jyldyń 18 qazan keshinde joǵalǵan edi. Onyń denesi tek osy jyldyń maýsym aıynda tabyldy.
Tergeý málimetinshe, qyzdy óltirip, denesin Jaıyq (Ýral) ózenine tastaǵan. Qylmysqa onyń súıiktisi men onyń sybaılasy kúdikke ilindi.